QazAqparat tilshisi Ǵ.Seıtaq «Seıdahmet Berdiqulov atyndaǵy syılyqtyń» laýreaty atandy
ASTANA. QazAqparat - Elordada buqaralyq aqparat quraldary ókilderi arasynda shaǵyn fýtboldan dástúrli túrde jyl saıynǵy Seıdahmet Berdiqulov atyndaǵy týrnır ótip jatyr. Sporttyq shara aıasynda Qazaqstannyń BAQ jýrnalısteri arasynda sport jýrnalısi, pýblıtsıst jáne qoǵam qaıratkeri Seıdahmet Berdiqulov atyndaǵy syılyq tabys etildi. Aǵymdaǵy jyly bul syılyqqa «QazAqparat» halyqaralyq aqparat agenttiginiń Batys Qazaqstan oblysyndaǵy menshikti tilshisi Ǵaısaǵalı Seıtaq ıe boldy.
Baıqaýdyń jeńimpazdary «Seıdahmet Berdiqulov atyndaǵy syılyqtyń laýreaty» arnaıy tósbelgisimen marapattalyp, dıplom men aqshalaı syılyqqa ıe boldy.
Seıtaq Ǵaısaǵalı Samıǵollauly 1958 jyly Batys Qazaqstan oblysy Bókeı ordasy aýdany Han ordasy aýylynda dúnıege kelgen. 2000 jyldan beri «QazAqparat» halyqaralyq aqparat agenttiginiń BQO boıynsha menshikti tilshisi qyzmetin atqarady. Oblystyń qoǵamdyq-saıası ómirine belsene aralasady. Qazaqstan Jazýshylar jáne Jýrnalıster odaqtarynyń múshesi. Ár jyldary «Mańdaı», «Aman bol, atamekenim», «Narynnyń nar uldary», «Aı-arýdyń alqasy», «Tek pen tamyr», «Jaqynym meniń - jalpaq el» jyr kitaptary jaryq kórgen.
Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń laýreaty, Q.Myrzalıev atyndaǵy múshaıranyń bas júldegeri. Qazaq radıosy uıymdastyrǵan «Qazaqstanym - qara shańyraǵym» jáne oblystyq «Oral óńiri» gazetiniń 90 jyldyǵyna oraı ótkizilgen «Jaıyq jyrlaıdy» respýblıkalyq jyr múshaıralarynyń júldegeri.
Aıta keteıik, Qazaqstannyń BAQ jýrnalısteri arasynda sport jýrnalısi, pýblıtsıst jáne qoǵam qaıratkeri Seıdahmet Berdiqulov atyndaǵy syılyq 1994 jyly belgilengen. Ol jylyna bir ret úsh jeńimpazǵa tapsyrylady. Onyń ishinde eki syılyq - memlekettik tildiń mártebesin kóterý maqsatynda qazaq tilinde jarııalanǵan materıaldarǵa, bir syılyq - orys tilinde jarııalanǵan materıaldarǵa beriledi.
Búgingi kúnge deıin Nesip Júnisbaı, Qydyrbek Rysbek, ıÝrıı Lıfıntsev, Dıdar Tóleýish, Ńurǵazy Sasaev, Ǵalym Súleımen, Aqyn Ordabaı, Ársen Sattar, Mádı Manatbek, Іlııas Joldas, Farhad Izızov, Valerıı Ilın, Rabat Jánibek, Laýra Barlybaeva, Pavel Tsybýlın, Sádibek Túgel, Ómirzaq Sultanov, Anatolıı Gavrılov, Teljan Qúderov, Gúlstan Qanat, Musaǵalı Tasqalıev syndy esimderi elimizge jaqsy tanys jýrnalıster osy syılyqty ıelengen bolatyn.
