«QazAqparat» tilshisi «Bolashaq kásip mamandary» baıqaýynda úzdik dep tanyldy
ASTANA. QazAqparat - Búgin «Kásipqor» holdıngi «Bolashaq kásip mamandary» atty BAQ arasyndaǵy baıqaýdyń jeńimpazdaryn marapattady.
Baıqaý Qazaqstannyń barlyq salalarynyń turaqty damýyn qamtamasyz etetin kadrlardy daıarlaý men kásibı-tehnıkalyq bilim berý máselelerine qoǵamnyń nazaryn aýdartý maqsatynda uıymdastyryldy.
Komıssııa otyrysynyń nátıjesinde Atyraý qalasyndaǵy qaıta daıarlaý jáne biliktilikti arttyrýǵa arnalǵan óńiraralyq kásibı ortalyqtyń, Astana men Almatydaǵy álemdik deńgeıdegi bolashaq kolledjderdiń qyzmetine arnalǵan baıqaýdyń jeńimpazdarynyń esimderi anyqtaldy. Osy oraıda konkýrsta «Úzdik TV materıal» atalymy boıynsha 1-oryndy «24 kz» telearnasynyń jýrnalısi Aınur Qýat ıelendi.
«Baspa BAQ betterindegi úzdik materıal» atalymynda birinshi orynǵa «Aıqyn» gazetiniń tilshisi Aıhan Shárip laıyq dep tanyldy.
Al «Internet BAQ betterindegi úzdik materıal» atalymy boıynsha 1-oryndy «Aınalaıyn» saıtynan Kúlshat Hamıtova aldy. Sonymen qatar «Úzdik radıo materıal» atalymynda birinshi oryn «1001 kásip» baǵdarlamasynyń júrgizýshisi Maqpal Imanbaevaǵa tapsyryldy.
Budan bólek, «Qazaqstandaǵy tehnıkalyq jáne kásibı bilim berýdiń qazirgi jaǵdaıy men tehnıkalyq, kásibı bilimdi jańartýdaǵy Holdıngtiń róli týraly» baıqaýda «Baspa BAQ betterindegi úzdik materıal» atalymynda 1-oryndy «Lıter» gazetinen Olga Vınokýrova aldy.
«Internet BAQ betterindegi úzdik materıal» atalymynda birinshi oryndy «QazAqparat» HAA tilshisi Qanat Toqabaev ıelendi. «Úzdik radıo materıal» atalymynda «Qazaq radıosynyń» jýrnalısi Dáýren Erbolattyń jumysy joǵary baǵalandy.
