QazAqparat tilshisi «Aqparat salasynyń úzdigi» atandy
ORAL. QazAqparat - Búgin BQO ákimdiginde Buqaralyq aqparat quraldary qyzmetkerleriniń kúnine oraı saltanatty jıyn boldy, dep habarlaıdy QazAqparat tilshisi.
Merekelik is-sharaǵa qatysqan oblys ákimi Ǵalı Esqalıevtiń atap ótkenindeı, táýlik boıy tynym tappaı eńbek etetin aqparat maıdany sarbazdarynyń qoǵamda alar orny erekshe.
«Qalam terbegen jýrnalıster demokratııalyq qundylyqtardy, qoǵamda oryn alyp jatqan máselelerdiń ashyqtyǵyn qamtamasyz etip, órkenıet kóshiniń ilgeri basýyna, eldiń túıtkildi jaıttaryn sheshýge óz úlesterin qosyp, aıanbaı qyzmet etýde», dedi ákim.
Óńir basshysy aǵa býynnyń abyroıly isin keıingi tolqyn sátti jalǵastyryp kele jatqanyn, qazirgideı qıyn-qystaý kezeńde jýrnalısterdiń de aldyńǵy shepten tabylyp otyrǵanyn jetkizdi.
Saltanatty jıyn barysynda sala úzdikteri túrli marapattarǵa ıe boldy. Atap aıtqanda, «Jaıyq Press» JShS bas dırektorynyń birinshi orynbasary, halyqaralyq «QazAqparat»agenttiginiń tilshisi Ǵaısaǵalı Seıtaq, «Aqjaıyq» telearnasy dırektorynyń orynbasary Klara Qambetova, aǵa operatory Rústem Ishanov, «Habar-24» telearnasynyń BQO boıynsha menshikti tilshisi Botakóz Bazarbaeva, oblystyq «Prıýrale» bas redaktorynyń orynbasary Lýchııa Kýrararý «Aqparat salasynyń úzdigi» tósbelgisimen, jýrnalıstıka ardagerleri Esenjol Qystaýbaev, Lıýdmıla Korına, Sergeı Kýlpın «Eńbek ardageri» medalimen marapattaldy. Sondaı-aq Aqparat jáne qoǵamdyq damý mınıstrliginiń Qurmet gramotalary, basqa da marapat, syılyqtar tabys etildi.
