«QazAqparat» The Business Year-men memorandýmǵa qol qoıdy
ASTANA. QazAqparat - Búgin Astanada «QazAqparat» HAA bas dırektorynyń birinshi orynbasary Danııar Óteshev pen The Business Year: Kazakhstan kompanııasynyń óńirlik menedjeri Djýlıana Karýzo yntymaqtastyq memorandýmyna qol qoıdy.
«QazAqparat» halyqaralyq aqparat agenttigi men The Business Year (TBY) halyqaralyq baspasy jáne zertteý kompanııasy jalpy qyzmetti uıymdastyrý, kontent almasý, birikken jobalar ázirlep, birlesken sharalardy uıymdastyrý jóninde kelisim jasasty.
«The Business Year» - ulttyq ekonomıkadaǵy jyldyq ekonomıkalyq resýrstar baspasy jáne aldyńǵy qatarly zertteý fırmalarynyń biri. 35 elde ókildigi bar TBY búkil álem boıynsha bıznes pen saıasatty jasaýshy adamdar men ıdeıalarǵa qoljetimdilikti qamtamasyz etedi.
Danııar Óteshev TBY-men jasalǵan yntymaqtastyq memorandýmynyń tıimdi tustaryna toqtaldy. «Halyqaralyq baılanystardy damytý maqsatynda "QazAqparat" HAA tek Qazaqstannyń ǵana emes, sonymen qatar álemdegi 35 eldiń ulttyq ekonomıkasyndaǵy jyldyq ekonomıkalyq resýrstar baspasy jáne aldyńǵy qatarly zertteý fırmalarynyń biri The Business Year-men (TBY) yntymaqtastyq memorandýmyn jasasty. TBY álemdik bıznes elıta ókilderiniń arasyndaǵy tanymal ári sheteldiń áleýetti ınvestorlaryn túrli elderdiń damýy men ekonomıkalyq ahýaly týraly aqparatpen qamtamasyz etetin beldi basylymdardyń biri», - dedi «QazAqparat» HAA bas dırektorynyń birinshi orynbasary.
