«QazAqparat» shaǵyn qalalar men aýdandarda tilshiler jelisin keńeıtedi
ASTANA. QazAqparat - «QazAqparat» Halyqaralyq aqparat agenttiginiń Bas dırektory Asqar Ýmarov kompanııanyń 2018 jylǵa arnalǵan josparlary jóninde málim etti.
«Bıyl «QazAqparat» HAA tórt tilde ekonomıkalyq jańalyqtar taspasy jobasyn iske qosady. Bul baǵytta suranys bar. Aıta keteıik, qytaılyq, reseılik ári túrkııalyq seriktesterimiz osy jobaǵa belsendi qatysýǵa nıetti. Búginde olarda osy tektes jobalar iske qosylǵan jáne sheteldik seriktester bizben birlese jumys isteýge qyzyǵýshylyq tanytyp otyr», - dedi Bas dırektor Ortalyq kommýnıkatsııalar qyzmetinde ótken baspasóz máslıhatynda.
Sondaı-aq ol «Kartadaǵy oryn» jobasy iske qosylatynyn aıtyp ótti. Osy oraıda apta saıyn Qazaqstan óńirlerindegi biregeı jerlerden fotoreportajdar jarııalanady.
«QazAqparat» óz kontentin damytý turǵysynda aldaǵy ýaqytta oblys ortalyǵynda, sonymen qatar shaǵyn qalalar men aýdandarda tilshiler jelisin keńeıtýdi josparlaıdy. Bul jumystar aýdandardy da keńinen qamtýǵa arnalǵan», - dedi Asqar Ýmarov.
Atap ótilgendeı, agenttik shet memleketterde strıngerlik jeliler qurýdy kózdep otyr.
«Shet memleketterde «QazAqparatpen» yntymaqtastyqty nyǵaıtýǵa nıetti adamdar kóptep kezdesedi. Búginde shetelde 7 tilshilik pýnktimiz bar. Osy oraıda Eýropa boıynsha jelini keńeıtýdi josparǵa aldyq. Sonymen qatar ózge de birqatar elderden adamdar óz usynystaryn jasap jatyr», - dedi «QazAqparat» agenttiginiń Bas dırektory.
Aıta keteıik, «QazAqparat» HAA aldaǵy ýaqytta online-translıatsııalar, fotoreportajdar men taqyryptyq jobalar sanyn arttyra túsedi. «Biregeı Qazaqstan» (Qazaqstannyń túkpir-túkpirinen jurtshylyqqa beımálim oryndar, kásiporyndar, nysandar men adamdar týraly maqalalar jarııalaý), «100 jańa esim» (100 jańa esimge engen adamdar týraly story formatynda kontentter daıyndaý) jobalaryn júzege asyrady.
2017 jyly «QazAqparat» saıtyn paıdalanýshylar 21 paıyzǵa ósken. Bul rette, inform.kz portalyn qaraýshylardyń jıyntyq kórsetkishi 28 mıllıondy qurasa, onyń ishinde 11,9 mıllıony - biregeı paıdalanýshylar bolyp otyr. Áleýmettik jelide agenttiktiń paraqshasyna jazylýshylar sany úsh esege deıin artty. 2017 jyly 18 taqyryptyq jobalar, 4 web-joba júzege asty.
