«QazAqparat» redaktory «Biz – baqytty otbasymyz» baıqaýynda júlde aldy
NUR-SULTAN. QazAqparat - QazAqparat – «Astana daryny» daryndylyqty damytý jáne psıhologııalyq súıemeldeý ortalyǵynyń uıymdastyrýymen Halyqaralyq Otbasy kúnine oraı «Biz – baqytty otbasymyz» atty qalalyq beınerolıkter baıqaýynyń jeńimpazdary marapattaldy, dep habarlaıdy elorda ákimdiginiń resmı saıty.
Táýelsizdiktiń 30 jyldyǵyna oraı uıymdastyrylǵan baıqaýǵa oqýshylar men olardyń ata-analary qatysty.
Konkýrsqa Nur-Sultan qalasynyń mektepke deıingi mekemelerinen 16, mektepterden 71, kolledjderden 13, barlyǵy 90 otbasy qatysty.
«Búkil álemdi jaılaǵan pandemııa kezeńiniń alǵashqy kezderi bárimizge aýyr bolǵany ras. Biz sol qıyn-qystaý kezde ata-analarmen jumys júrgizip, onlaın túrde semınarlar ótkizip turdyq. Byltyrdan beri túrli otbasylarmen jumys istep, qashyqtan baılanys jasaý arqyly osy saıysty qolǵa alǵan bolatynbyz. Ol kezde 17 otbasy qatysty. Bul bastamamyz óte jaqsy qoldaý taýyp, bıyl saıysqa 90 otbasy qatysýda. Sol 90 otbasynyń ishinen oza shapqanyn anyqtap, barlyq krıterıı boıynsha saraptaǵan kezde 32 úzdik beınerolıkti tańdap aldyq. Olardyń ishindegi 10 otbasyn búgingi marapattaý rásimine shaqyrdyq. Otan — otbasynan bastalady. Bıyl – Táýelsizdigimizge 30 jyl. Memleketimiz myqty bolyp, órkendep damýyna árbir otbasynyń úlesi bar dep oılaımyn. Sebebi otbasy — shaǵyn memleket. Árbir otbasy baqytty bolýǵa laıyqty», — dedi «Astana daryny» daryndylyqty damytý jáne psıhologııalyq súıemeldeý ortalyǵy dırektorynyń orynbasary Gúlbaqyt Býralkıeva.
Qatysýshylar berilgen ýaqyt ishinde otbasylyq qundylyqtar men dástúrlerdi, otbasy yntymaqtastyǵyn, mádenıetti qarym-qatynasty kórsete bilgen. Qazylar alqasy qatysýshylardyń beınerolıkterin baǵalaý krıterııleri arqyly iriktep, konkýrstyń jeńimpazdary men júldegerlerin «Dástúr uıytqysy otbasy», «Ánshiler otbasy», «Eńbekqor otbasy», «Sportshy otbasy», «Ónerli otbasy», «Kreatıvti otbasy», «Mereıli otbasy» sekildi túrli nomınatsııalar boıynsha anyqtady.
«Biz – baqytty otbasymyz» qalalyq beınerolıkter baıqaýynyń bas júldesine Ámirjanovtar otbasy ıe boldy.
«Biz — kópbalaly otbasymyz. Sonymen qatar ata-ananyń qaraýynsyz qalǵan balalarǵa da kómegimizdi berip turamyz. Olardy sportqa baýlyp, eńbekqorlyqqa úıretý arqyly kóp jumys isteımiz. Ózimizdiń týǵan tórt balamyz bolǵanyna qaramastan, ózge de balalardy qanatymyzǵa alyp, óz balalarymyzdaı kórip, meıirimdilik tanytamyz. Ár balanyń ózindik armany bolady. Sol armandardyń oryndalýyna sebepker bolyp, senimdilik qalyptasyrýǵa tyrysamyz», — dedi Aıda Ámirjanova.
Jeńimpazdar men júldegerler «Astana daryny» daryndylyqty damytý jáne psıhologııalyq súıemeldeý ortalyǵynyń bas júlde, I, II, III oryn dıplomdarymen marapattaldy jáne «Go-Make» QQ-nyń qoldaýymen aqshalaı syıaqy tabystaldy.
Aıta keteıik, bul baıqaýǵa «QazAqparat» agenttiginiń redaktory Rızabek Núsipbek qatysyp, úshinshi dárejeli dıplommen marapattaldy.
