«QazAqparat» pen «Tatar-ınform» yntymaqtastyq memorandýmyna qol qoıdy
QAZAN. QazAqparat - Qazaqstan Respýblıkasy men Reseı Federatsııasy arasyndaǵy yntymaqtastyq týraly Úkimetaralyq komıssııanyń otyrysynda «QazAqparat» halyqaralyq aqparat agenttigi men «Tatar-ınform» aqparat agenttigi yntymaqtastyq týraly memorandýmǵa qol qoıdy, dep habarlaıdy «QazAqparat» HAA.
Memlekettik aqparat agenttikteriniń qujatqa qol qoıý rásimi Tatarstan astanasyndaǵy Qazan ratýshasynda ótti. Memorandýmǵa «QazAqparat» HAA Bas dırektory Asqar Ýmarov pen «Tatar-ınform» AA Bas dırektory Shámil Sadyqov qol qoıdy.
«Bul memorandým Tatarstan men Qazaqstannyń birlesken jobalary, tatar jáne qazaq dıasporalarynyń ómiri týraly jańalyqtardy jyldam taratýǵa múmkindik beredi. Bizdiń múddelerimizdiń aıasy saıasat, ekonomıka, resmı hronıkamen ǵana shektelmeıdi. Biz qos halyqtyń tynys-tirshiligi, respýblıka turǵyndaryn tolǵandyryp júrgen máseleler jaıynda aqparat taratatyn bolamyz», - dep atap ótti Shámil Sadyqov.
«Qazaqstan Prezıdenti Nursultan Nazarbaev halyqqa Joldaýynda Reseı men Qazaqstannyń qarym-qatynasyn kópke úlgi dedi. Tatarstannyń Reseıdiń mańyzdy óńiri ekenin eskersek, sizdiń respýblıkańyzdan keletin aqparat qazaqstandyq aýdıtorııa úshin óte mańyzdy», - dedi Asqar Ýmarov.
Onyń aıtýynsha, «Tatar-ınform» AA-men áriptestikti damyta kele, «QazAqparat» HAA qos memleket ıgiligi úshin taǵy bir maqsatty, ıaǵnı aqparat almasýdy iske asyryp otyr.
«Biz úshin Qazannan senimdi aqparat alý, sonymen birge Astanadan senimdi aqparat usyný óte mańyzdy», - dep atap ótti Asqar Ýmarov.
Qos aqparat agenttigi qol qoıǵan yntymaqtastyq týraly memorandým kásibı yntymaqtastyqty nyǵaıtý jáne aqparat almasýǵa baǵyttalǵan. Atap aıtsaq, taraptar tájirıbe almasý jáne kásibılikti arttyrý úshin jýrnalıster jáne fototilshilermen almasýdy josparlap otyr. Aqparat agenttikteri óz memleketteriniń aýmaǵynda akkredıttelgen jýrnalıster men fototilshilerge olardyń kásibı qyzmetin júzege asyrý kezinde uıymdastyrýshylyq kómek kórsetetin bolady.
Eske sala keteıik, osy ýaqytqa deıin «QazAqparat» HAA eki reseılik aqparat agenttigi - TASS jáne «Bashınform» AA-men yntymaqtastyq týraly memorandýmǵa qol qoıǵan.
Qyzmet jyldarynda «QazAqparat» HAA álemniń 42 aqparat agenttigimen áriptestik ornatqan. Olardyń arasynda «Ázertadj» (Ázerbaıjan), «Anadoly» (Túrkııa), «Belta» (Belarýs), «IRNA» (Iran), «Kabar» (Qyrgyzstan), «Yonhap» (Ońtústik Koreıa), «ÓzA» (Ózbekstan), «Armenpress» (Armenııa), «Hovar» (Tájikstan) jáne taǵy basqalary bar.
Foto: www.tatar-inform.ru
