QazAqparat pen MENA agenttigi memorandýmǵa qol qoıdy
KAIR. QazAqparat - Búgin Kaırde «QazAqparat» halyqaralyq aqparat agenttigi bas dırektorynyń birinshi orynbasary Danııar Óteshev pen Middle East News Agency (MENA) Mysyr aqparat agenttiginiń bas redaktory - basqarma tóraǵasy Álı Hasan arasynda kelissózder ótti. Kezdesý barysynda eki BAQ arasynda ózara túsinistik týraly memorandýmǵa qol qoıyldy. Bul týraly QazAqparat tilshisi habarlaıdy.
Sondaı-aq, kelissózderge qazaqstandyq taraptan Qazaqstan Respýblıkasynyń Mysyr Arab Respýblıkasyndaǵy Tótenshe jáne Ókiletti Elshisi Arman Isaǵalıev pen Mysyrdaǵy QR Elshiliginiń keńesshisi Asqar Álibaev qatysty.
MENA basshysy «QazAqparat» HAA-men ózara yntymaqtastyqtyń Taıaý Shyǵys pen Soltústik Afrıkadaǵy iri aqparat agenttikteriniń biri úshin mańyzdy ekendigin atap ótti. Sebebi, álemde túrli BAQ-tar Mysyr týraly dáıeksiz aqparattar taratady, al Qazaqstannyń memlekettik aqparat agenttigimen ózara yqpaldastyq joǵary obektıvtilikke yqpal etedi.
Sondaı-aq, Álı Hasan ózara túsinistik týraly memorandýmǵa qol qoıýdyń eki el arasyndaǵy qarym-qatynasty damytý úshin mańyzdy ekendigin tilge tıek etti. Buǵan 2016 jyldyń aqpanynda Mysyr Prezıdenti Ábdel Fattah Ás-Sısıdiń Qazaqstan Respýblıkasyna jasaǵan sapary serpin bergen.
Óz kezeginde, QR Elshisi MENA basshylyǵyna ystyq lebizi úshin alǵys bildirip, Qazaqstan men Mysyr arasyndaǵy ekijaqty qarym-qatynasty odan ári damytýǵa daıyn ekendigin málim etti. Arman Isaǵalıev te Mysyrǵa ekonomıka men ishki jaǵdaıdy damytýda turaqtylyq tiledi.
«QazAqparat» halyqaralyq aqparat agenttigi bas dırektorynyń birinshi orynbasary Danııar Óteshev Qazaqstan memlekettik aqparat agenttigi tek dáıekti resmı derekkózderden tekserilgen aqparattardy ǵana taratatynyn atap ótti. 
«QazAqparat» agenttigi tek memlekettik BAQ-tarmen ǵana jumys isteıdi. Qazaqstan memlekettik aqparat agenttigi Qazaqstannyń medıa salasynda kóshbasshy pozıtsııaǵa ıe. TOP-5 jańalyqtar agenttigine kiredi jáne dáıeksóz keltiriletin derekkózder arasynda birinshi oryn alady», - dep atap ótti D.Óteshev.
Memorandýmǵa qol qoıý rásimi MAR-daǵy Qazaqstan Elshiliginiń qoldaýymen júzege asyryldy.
