«QazAqparat» qyzmetkerleri «Aqparat salasynyń úzdigi» belgisimen marapattaldy (FOTO)
ASTANA. QazAqparat - Búgin QR Premer-Mınıstriniń orynbasary Berdibek Saparbaev aqparat jáne baılanys salasy qyzmetkerlerin kásibı merekelerimen quttyqtady.
«Sizder bılik pen halyqtyń arasyndaǵy kópir bolyp eseptelesizder. Qarapaıym halyq sizder arqyly ózderiniń sheshilmeı jatqan máselelerin bılikke jetkizip, sheshedi. Sizder ekonomıkamyzdyń damýyna úlken úles qosasyzdar. Óıtkeni qazirgi damý zamanynda eń qymbat, eń kerek - ol málimet. Sizder memleketke onyń ishinde úkimetke tez, jyldam kerekti málimetterdi beresizder. Sol sizder bergen málimetterdi taldaý men zertteýdiń nátıjesinde bizder ózimizdiń josparymyzǵa ózgerister engizip, elimizdiń ekonomıkasynyń damýyna úles qosqymyz keledi», - dedi B.Saparbaev. Úkimet basshysynyń orynbasary óz sózinde elimizde «Aqparattyq Qazaqstan-2020» baǵdarlamasy júzege asyrylyp jatqanyn atap ótti. Onyń sózine qaraǵanda, osy baǵdarlamanyń arqasynda elimizdegi aqparattyq júıe jaqsy damyp keledi. «Birikken Ulttar Uıymynyń reıtıngine sáıkes, Qazaqstandaǵy baılanys salasyndaǵy aqparattyń damýy aldyńǵy qatarda. Onyń ishinde ǵalamtordyń, uıaly baılanystyń baǵasy jyldan jylǵa tómendep keledi. Qazirgi tańda Qazaqstan uıaly baılanys tarıfi boıynsha álemde 17-shi, al ǵalamtor boıynsha 8-shi oryndamyz», - dedi ol. Osydan keıin B.Saparbaev aqparat jáne baılanys salasynyń qyzmetkerlerine «Aqparat salasynyń úzdigi» belgisin tabys etti. Bul rette aıta keterligi, shara barysynda «QazAqparattyń» fototilshisi Muhtar Holdorbekov, Qaraǵandy oblysyndaǵy tilshisi Valentına Elızarova jáne orys redaktsııasynyń redaktory Janar Muhamedııarova QR Investıtsııalar jáne damý mınıstri Áset Isekeshevtiń qolynan «Aqparat salasynyń úzdigi» belgisin aldy.
