«QazAqparat» Qazaqstan Táýelsizdiginiń jarııalanýy týraly aqjoltaı aqparatty alǵashqylardyń biri bolyp álemge taratty - I.Tasmaǵambetov
«Qurmetti Dáýren Keńesuly! Sizdi jáne ózińiz basqaryp otyrǵan ujymdy «QazAqparat» halyqaralyq agenttiginiń 95 jyldyq mereıtoıymen shyn júrekten quttyqtaımyn. «QazAqparat» bir ǵasyrǵa jýyq tarıhynda qazaq halqynyń qýanyshy men qaıǵysyn birge bólisip, Qazaqstan Respýblıkasy Táýelsizdiginiń jarııalanýy týraly aqjoltaı aqparatty alǵashqylardyń biri bolyp álemge taratty. Búginde óziniń shyǵarmashylyq mektebi qalyptasqan jańalyqtar ordasynda myńdaǵan jas tilshiler shyńdalyp shyqty. Bútin bir dáýirdiń shejiresin jınap, jaqsylyqty jarııa etýge asyǵatyn agenttiktiń bedeli jyldan jylǵa artyp, órisi keńeıdi. Redaktsııa ujymynyń kásibı biliktiligi men shyǵarmashylyq bastamalary arqasynda qoǵamda otansúıgishtik, erlik, batyrlyq qundylyqtary oryndy dáriptelip otyr. Bul oraıda, Siz arqyly «QazAqparat» ujymyna jáne barsha oqyrmandaryna ystyq yqylasymdy jetkizgim keledi. Aldaǵy ýaqytta da abyroılaryńyz asqaqtap, jaqsylyqty jarııa etý jolyndaǵy ıgi bastamalaryńyz jarasymdy jalǵasyn tabatynyna senimdimin. Ózińizdi jáne ujymyńyzdy taǵy da quttyqtaı otyryp, zor densaýlyq, qajymas qaırat, tolaıym tabystar tileımin!», delingen quttyqtaýda.