«QazAqparat» Halyqaralyq aqparattyq agenttigi óziniń oqyrmandaryn Jańa jylmen quttyqtaıdy
Kompanııada qalyptasqan ıgi dástúr boıynsha, bizdiń klıentterimizge, oqyrmandarymyzǵa, jazylýshylarymyzǵa «Qurmetti oqyrmandarymyz, saıtty paıdalanýshylar, Jańa 2014 jyl qutty bolsyn!» degimiz keledi.
2013 jyl jańalyqqa toly boldy. Olardyń arasynda jańalyqtar lentasynan oryn almaǵan, tikeleı QazAqparatqa qatysty kóp ózgerister boldy. Jańa jyl qarsańynda kompanııa halyqaralyq aqparattyq agenttik bolyp qaıta quryldy, sonymen birge Astananyń Sol jaǵalaýyndaǵy «Altyn Orda» bıznes ortalyǵynyń jańa ǵımaratynan oryn tepti.
Ózderińiz kýá bolyp otyrǵanyńyzdaı, bizde jańalyq kóp! Alaıda, ótken jyldar ishinde jınaqtaǵan basty qundylyǵymyz - baı tájirıbe men bizdiń klıentterimizdi 2013 jyly joǵaltqan joqpyz, kerisinshe, molaıta tústik.
Mass-medıa salasynda jumys jasaı otyryp, sizder bizdiń jedeldigimizdi, shynaıylyǵymyzdy, obektıvtiligimizdi baǵalaǵandyqtaryńyz sekildi biz de sizderdiń senimderińizdi joǵary baǵalaımyz! Sondyqtan bizdiń dostarymyzǵa shyn júrekten tek qana ońdy jańalyqtar tileımiz! Jańa jyl sizder men sizderdiń jaqyndaryńyzǵa jańa baqyt, qut, bereke ákelsin!
2014 jyl - jylqy jyly, sondyqtan Qazaqstan úshin ol baqýatty, baqytty jyl bolady dep senemiz. Óıtkeni, qazaq úshin jylqy janýary degen senimdi serik, kómekshi, eń bastysy, ol - qazaq halqynyń basty qundylyǵy desek qatelespespiz. Sebebi, ejelgi dáýirden (Science jýrnalynyń habarlaýynsha, jaqynda brıtandyq ǵalymdar jylqy janýarynyń 5,5 myń jyl buryn Soltústik Qazaqstan aýmaǵynda alǵash ret qolǵa úıretilgenin anyqtady) jylqyny adam balasy «minseń - kólik, jeseń - as» dep joǵary baǵalaǵan.
Qazaq tilinde jylqy sóziniń seksenge jýyq sınonımi kezdesedi!
Keler jylǵa artqan senimimiz aqtalsyn. Kıeli janýar bizderge densaýlyq, baqyt, shattyq alyp kelsin!
Іzgi nıetpen, «QazAqparat» ujymy!
