«QazAqparat» HAA jáne «Qatar News Agency» jańalyq almasýǵa kelisti
Katar memlekettik aqparat agenttigi Qatar News Agency basshylyǵymen kezdesýde taraptar kontent almasý boıynsha yntymaqtastyqqa qyzyǵýshylyq tanytty. Qazaqstan jáne Qatar aqparat agenttikteri arasynda keshendi kelisim jasasý josparlanýda.
«QazAqparat» HAA jáne Qatar News Agency ózara tıimdi aqparat almasýdy damytyp, jańalyqtar men saraptamalyq materıaldar almasady, sondaı-aq portaldardy ulttyq tilderge oqshaýlaý máselelerinde eki agenttiktiń tabysty tájirıbesin paıdalana alady. Budan basqa, neǵurlym tıimdi jumys isteý úshin Qazaqstan jáne Qatar tarapy ózderiniń tilshiler jelilerin birlesip paıdalanýǵa daıyn.
Dohada taǵy bir iri aqparat holdıngi – Qatar Media Corporation basshylyǵymen kelissózder júrgizildi. Búgingi tańda bul medıa kompanııanyń qurylymyna birneshe telearna men radıostantsııa kiredi.
Qatar Media Corporation basshylyǵy Prezıdent Teleradıokesheniniń qyzmetteri qurǵan áleýmettik jelilerge arnalǵan kontenttiń joǵary sapasyn atap ótti. Taraptar kontentti birlesip jasaý jáne ony tıimdi taratý bóliginde yntymaqtastyqtyń yqtımal nusqalaryn talqylady. Qatar Media Corporation basshylyǵy jaqyn arada Qazaqstanǵa barýdy josparlap otyr.
«QazAqparat» HAA - 1920 jyly qurylǵan Qazaqstannyń ejelgi aqparat agenttigi. 2022 jyldyń 1 sáýirinen bastap «QR Prezıdentiniń Teleradıokesheni» KEAQ quramyna endi.
Qatar News Agency - Qatardyń memlekettik aqparat agenttigi. Ol 1975 jyly 25 mamyrda qurylǵan. Onyń shtab-páteri Qatar astanasy Dohada ornalasqan. Qatar News Agency jańalyqtary arab jáne aǵylshyn tilderinde taraıdy, sonymen qatar ıspan jáne portýgal tilderinde jańalyqtar qyzmeti bar.
Qatar Media Corporation (buryn Qatar General Broadcasting and Television Corporation dep atalǵan) – Qatardaǵy qoǵamdyq habar taratý jelisi. Ol 1997 jyly 27 sáýirde tirkeldi. Qatar Media Corporation quramyna birneshe telearna men radıostantsııa, sonyń ishinde Qatar TV, Qatar Broadcasting Service (QBS) radıostantsııasy, Qatar Radio kiredi.
Aıta keteıik, buǵan deıin QR Prezıdenti teleradıokesheni arabııalyq «Ál-Jazıra» spýtnıkti telearnasymen áriptestik qarym-qatynas ornatqanyn jazǵan edik.
