«QazAqparat» HAA Ulttyq Olımpıada komıtetiniń resmı aqparattyq áriptesi atandy
Kelisimge Qazaqstan Respýblıkasy Ulttyq Olımpıada komıtetiniń bas dırektory Serik Qasqabasov jáne «QazAqparat» HAA bas dırektory Asqar Ýmarov qol qoıdy. Yntymaqtastyq aıasynda QazAqparat «Sport-Inform» sporttyq aqparat agenttigi arqyly Ulttyq Olımpıada komıtetine qazaqstandyq atletter qatysatyn jarystardan, sondaı-a UOK-niń basshylyǵymen ótetin barlyq sharalardan habar taratý boıynsha qoldaý kórsetedi.
Qos tarap Qazaqstanda olımpıadalyq qozǵalys pen olımpıadalyq qundylyqtardy nasıhattaý, qazaqstandyq sportshylar men olımpıadalyq sport túrlerinen QR ulttyq qurama komandalardyń jetistikteri týraly aqparattyq-nasıhattaý jumystaryn birlesip júzege asyrý týraly ýaǵdalasty.
«Keler jyly Qazaqstan Respýblıkasy Ulttyq Olımpıada komıteti úshin aqparattyq ashyqtyq saıasaty erekshe mańyzdy bolmaq. Bul Qazaqstannyń UOK prezıdenti Tımýr Qulybaevtyń qoıyp otyrǵan mindetteriniń biri. 2018 jyldyń 1 qańtarynan bastap Bıýdjettik kodekstiń normasy kúshine enedi. Oǵan sáıkes Ulttyq Olımpıada komıteti pen Ulttyq sport federatsııalarǵa jańa ókilettilikter beriledi. Sonymen qatar qysqy Olımpıada oıyndaryna bir aıdan astam ǵana ýaqyt qaldy. Osy kelisimniń aıasynda qazaqstandyq sportshylardyń Ońtústik Koreıadaǵy Olımpıada oıyndaryndaǵy óner kórsetýinen tolyqqandy aqparattandyrý jumysy bolatynyna senimdimin», - dedi Serik Qasqabasov.
Aıta ketelik, «QazAqparat» HAA UOK-tiń «Resmı aqparattyq áriptesi» mártebesin alǵan alǵashqy BAQ ókilderiniń biri boldy.
