«QazAqparat» HAA tilshisi «Altyn qalam» baıqaýynyń jeńimpazy atandy
KÓKShETAÝ. QazAqparat - Aqmola oblysynyń ákimi Ermek Marjyqpaev 28 maýsym - Buqaralyq aqparat quraldary qyzmetkerleriniń merekesi kúni bir top jýrnalısti jáne sala ardagerlerin marapattady, dep habarlaıdy QazAqparat tilshisi.
Saltanatty sharada aımaq basshysy tilshilerdi kásibı merekelerimen quttyqtap, oblystyń jáne tutas eldiń órkendeýine qosyp otyrǵan zor úlesterin atap ótti.
«Óńirdiń jylt etken árbir jańalyǵyn jazyp, talaı taǵdyrlarǵa aralasyp júrgen jýrnalıster qaýymynyń elimizdiń, oblysymyzdyń damyp, órkendeýine qosyp kele jatqan úlesteri orasan zor. Sizder aýyr ári qyzyqty mamandyqtyń ıesisizder. Kásibı joǵary biliktilik pen óz isterińizge degen jaýapkershilikterińizdiń arqasynda halyqtyń aqparattaný deńgeıi artyp, baılanys aıasy keńeıýde», - dedi quttyqtaý sózinde aımaq basshysy Ermek Marjyqpaev.
Aıta keteıik, búginde oblys aýmaǵynda 100-ge jýyq BAQ tirkelip, jumys isteýde. Sondaı-aq respýblıkalyq BAQ-tardyń 28 menshikti tilshisi eńbek etýde.
Buqaralyq aqparat quraldary qyzmetkerleriniń kásibı merekesine oraı óńirdiń birqatar tilshisi QR Prezıdenti Qasym-Jomart Toqaevtyń Alǵys hatymen, «Eńbek ardageri» medalimen, «Aqparat salasynyń úzdigi» tósbelgisimen jáne Aqmola oblysy ákiminiń Alǵys hatymen marapattaldy.
Budan bólek, shara barysynda «Altyn qalam» jyl saıynǵy oblystyq baıqaýynyń jeńimpazdary marapattaldy. Konkýrsqa respýblıkalyq jáne jergilikti BAQ ókilderi men ardager jýrnalıster birneshe atalym boıynsha qatysqan edi.
«QazAqparat» HAA-nyń Aqmola oblysyndaǵy menshikti tilshisi Aslan Ospanov «Jastar jylyn úzdik medıalyq súıemeldeý» atalymynda jeńimpaz atandy.
Baıqaý jeńimpazdaryna aqshalaı sertıfıkattar tabystaldy.
