«QazAqparat» HAA-nyń Qazaqstannyń basqa elderge gýmanıtarlyq kómek berýi týraly materıalyna túsinikteme

ASTANA. QazAqparat - «QazAqparat» Halyqaralyq aqparat agenttigi úsh memleketke berilgen gýmanıtarlyq kómek jaıyndaǵy materıaldyń taqyrybynda ketken qatelik úshin oqyrmandardan keshirim suraıdy.

«QazAqparat» HAA saıtynda 2018 jylǵy 3 qańtar kúni 13:46-da shyqqan materıalda Qazaqstan Respýblıkasy jáne basqa memleketter aýmaǵynda tabıǵı jáne tehnogendik sıpattaǵy tótenshe jaǵdaılardy joıý úshin Qazaqstan Respýblıkasynyń Qorǵanys jáne aeroǵarysh ónerkásibi mınıstrligine buǵan deıin atalǵan vedomstvodan Sırııaǵa, Tájikstanǵa jáne Qyrǵyzstanǵa gýmanıtarlyq kómek retinde bólingen qarajattyń ornyna Qazaqstan Respýblıkasy Úkimetiniń tótenshe rezervinen bólinýi tıis materıaldyq qun týraly aıtylady.

Qazaqstan Respýblıkasy Úkimetiniń tıisti qaýlysyna 2017 jyldyń 20 jeltoqsanynda qol qoıylǵan jáne ol «Ádilet» aqparattyq-quqyqtyq júıesiniń saıtynda jarııalandy. 

Osylaısha, materıalda atalǵan memleketterge gýmanıtarlyq kómek bólý týraly sóz bolmaǵan. Qate qoıylǵan taqyryp «QazAqparat» HAA paıdalanýshylaryn shatastyrýy múmkin.

Osyǵan baılanysty «QazAqparat» HAA redaktsııasy aqparat agenttiginiń barsha oqyrmanynan keshirim suraıdy.