«QazAqparat» HAA men Japonııanyń Kyodo agenttigi yntymaqtastyq memorandýmyna qol qoıdy
ASTANA. QazAqparat - «QazAqparat» Halyqaralyq aqparat agenttigi men Japonııanyń Kyodo aqparat agenttigi yntymaqtastyq týraly memorandýmǵa qol qoıdy, dep habarlaıdy «QazAqparat» HAA tilshisi.
Taraptar qujatqa qashyqtyqtan: Astanada «QazAqparat» HAA bas dırektorynyń birinshi orynbasary Danııar Ýteshev, Tokıoda Kyodo aqparat agenttigi halyqaralyq baılanystar bóliminiń dırektory Kakýıa Ogata qol qoıdy.
Qujatqa sáıkes, taraptar elderdiń ishki jáne halyqaralyq ómirindegi aıtýly oqıǵalar týraly senimdi ári jyldam aqparattarmen turaqty túrde almasyp otyrady. «QazAqparat» pen Kyodo ozat tájirıbeni úırený jáne kadrlar biliktiligin arttyrý maqsatynda jýrnalıst, fototilshi jáne basqa mamandardy almasýǵa nıetti.
Budan tys, aqparat agenttikteri óz memleketiniń aýmaǵynda akkredıttelgen seriktesiniń jýrnalısteri men fototilshileriniń kásibı qyzmetin júrgizýine qolǵabys etedi.
Eske sala keteıik, qazirgi kezde «QazAqparat» HAA álemniń 43 aqparat agenttigimen yntymaqtastyq memorandýmyna qol qoıǵan. Olardyń arasynda: TASS (Reseı), «Azertadj» (Ázerbaıjan), «Anadolý» (Túrkııa), «Sınhýa» (QHR), Télam (Argentına), The Islamic Republic News Agency (Iran), «Kabar» (Qyrǵyzstan), Yonhap (Ońtústik Koreıa), ÓzA (Ózbekstan), Middle East News Agency (Mysyr), Empresa Brasil de Comunicação medıaholdıngi (Brazılııa), «Hovar» (Tájikstan), Afına-Makedonııa jańalyqtar agenttigi (Grekııa), Ufuq News (Aýǵanstan), t.b. bar.
