«QazAqparat» HAA men Pákistannyń ARR agenttigi yntymaqtastyq memorandýmyna qol qoıdy

ISLAMABAD. QazAqparat - Islamabadta «QazAqparat» halyqaralyq aqparat agenttigi men Pákistannyń The Associated Press of Pakistan Corporation (APP) arasynda yntymaqtastyq týraly memorandýmǵa qol qoıý rásimi ótti, dep habarlaıdy «QazAqparat» HAA tilshisi.

Qujatqa Qazaqstan tarapynan «QazAqparat» HAA bas dırektory Asqar Ýmarov, Pákistan tarapynan ARR bas dırektory Masýd Málik qol qoıdy.

Qol qoıý rásimi 25 aqparat agenttigi, sonyń ishinde QazAqparattyń seriktesteri - Mysyrdyń MENA (Middle East News Agency) agenttigi, Rýmynııanyń AGERPRESS agenttigi, Irannyń IRNA (The Islamic Republic News Agency) agenttigi, Afına-Makedonııa jańalyqtar agenttigi ókilderiniń qatysýymen Pákistan astanasynda ótip jatqan Aqparat agenttikteriniń halyqaralyq konferentsııasy aıasynda uıymdastyryldy.

Sharaǵa, sondaı-aq Qazaqstan Respýblıkasynyń Pákistan Islam Respýblıkasyndaǵy Tótenshe jáne ókiletti elshisi Barlybaı Sadyqov ta qatysty.

Yntymaqtastyq memorandýmy «QazAqparat» HAA men ARR arasyndaǵy ózara seriktestikti ornatýǵa, kásibı yntymaqtastyqty damytýǵa negiz qalady.

Aıta keteıik, Pákistan buqaralyq aqparat quraldary Qazaqstanǵa jáne qazaqstandyq áriptesteriniń jumysyna qyzyǵýshylyq tanytyp otyr. Atap aıtqanda, ótken aptada pákistandyq BAQ ókilderinen quralǵan top Astanaǵa bardy. QR Aqparat jáne kommýnıkatsııalar mınıstrliginiń Ortalyq kommýnıkatsııalar qyzmetinde «Medıaseriktestik: Qazaqstan men Pákistan» taqyrybymen ótken dóńgelek ústel otyrysynda taraptar eki el arasynda aqparat, mádenı-gýmanıtarlyq salalardaǵy yntymaqtastyqty damytý máselelerin talqylady.