«QazAqparat» HAA men Otandastar qory dıaspora saıasaty boıynsha áriptestik týraly memorandým jasady

NUR-SULTAN. QazAqparat - Búgin «Otandastar qory» kommertsııalyq emes aktsıonerlik qoǵamynyń Birinshi vıtse - prezıdenti Talǵat Múbarakuly Adýov pen «QazAqparat» Halyqaralyq aqparat agenttiginiń Bas dırektory Asqar Qýanyshuly Ýmarov Dıaspora saıasaty salasyndaǵy yntymaqtastyqty ilgeriletý jáne nyǵaıtýǵa arnalǵan ózara túsinistik jáne áriptestik týraly memorandýmǵa qol qoıdy.

Memorandýmnyń maqsaty shet elderde qazaq tilinde jaryq kóretin BAQ jáne jýrnalıstermen (tilshi, fototilshi, sarapshylarmen) baılanys ornatý, olarǵa jan-jaqty qoldaý kórsetý, tájirıbe jáne aqparat almasýdy qamtamasyz etý.

Memorandým aıasynda shet elderde qazaq tilinde jaryq kóretin BAQ jáne Jýrnalıster birlestigin qurý arqyly shet elderde qazaq tildi BAQ-men baılanys ornatylyp, Qazaqstanǵa oralǵan etnıkalyq qazaqtardy jáne shet elde turatyn otandastardy qoldaýǵa baǵyttalǵan sharalardyń keńinen aqparattandyrý kózdeledi.

«Elbasynyń V Dúnıejúzilik qazaqtar quryltaıynda bergen tapsyrmalaryn júzege asyrý maqsatynda etnıkalyq qazaqtardy jáne shetelde turatyn otandastardy qoldaýǵa baǵyttalǵan barlyq is-sharalardy aqparattandyrýda «QazAqparat» Halyqaralyq aqparat agenttigi bizdiń negizgi seriktesimiz bolyp tabylady. Osy áriptestik qarym qatynasty odan ári nyǵaıtý maqsatynda Qazaqstanda jáne shet elderde qazaq tilinde jaryq kóretin BAQ ókilderiniń Birlestigin quryp, olarǵa jan-jaqty qoldaý kórsetýdi kózdep otyrmyz», - dedi «Otandastar qory» KEAQ Birinshi vıtse - prezıdenti T. Adýov.

Óz kezeginde «QazAqparat» HAA Bas dırektory A. Ýmarov shet elderde jaryq kóretin qazaqtildi baspasózben baılanysty damytýdyń mańyzyna toqtaldy. «QazAqparat saıtynda apta saıyn shetelderde jaryq kóretin qazaqtildi basylymdarǵa sholý jarııalanady. Ózbekstan, Mońǵolııa, Qytaıda jaryq kóretin basylymdarmen, jýrnalıstermen baılanysymyz bar. «Otandastar qorymen» birlesken jumystar nátıjesinde ondaı baılanysymyz tereńdeı túsedi degen úmittemiz», - dedi A. Ýmarov.

Taraptar atalmysh memorandým boıynsha áriptestik aıasynda tıimdi, ózara yntymaqtastyqqa arnalǵan qolaıly sharttar jasaýǵa umtyla otyryp, Memorandýmǵa qol qoıý barysynda birlesken sharalardy ótkizýdiń bolashaǵyn da talqylady. Sonyń ishinde 2019 jyldyń qarasha aıyna qaraı josparlanǵan «Otandastar forýmynda» shetelde jaryq kóretin qazaqtildi BAQ ókilderiniń alǵashqy otyrysyn ótkizý josparlanǵan.