«QazAqparat» HAA men «Atyraý-Aqparat» arasynda memorandým jasaldy
NUR-SULTAN. QazAqparat - «QazAqparat» Halyqaralyq aqparat agenttigi men «Atyraý-Aqparat» medıa xoldınginiń arasynda ózara yntymaqtastyq týraly memorandýmǵa qol qoıyldy, dep habarlaıdy QazAqparat tilshisi.
Memorandýmnyń maqsaty aqparat salasynda yntymaqtastyq pen berik baılanys ornatý, qos taraptyń medıa mamandarynyń ózara tájirıbe almasýy arqyly kásibı turǵyda ósýine yqpal jasaý bolyp otyr. Budan bólek, «QazAqparat» pen «Atyraý-Aqparat» aımaqtyq medıakeńistikte sapaly kontentti arttyrý joldaryn qarastyryp, óńirlerdegi jýrnalıstıkany damytýǵa da qoldaý jasamaq. Aıta keterligi, osy shara aıasynda quramynda oblystyq jáne aýdandyq gazettiń ókilderi bar «Atyraý-Aqparat» delegatsııasy «QazAqparatta» qonaqta bolyp, agenttiktiń búgingi tynys-tirshiligimen tanysty.
Al eki tarap arasyndaǵy Memorandým elimizde jáne jahanda bolyp jatqan jańalyqtardy onlaın rejımde jedel ári shynaıy taratýǵa, sapaly kontent óndirýge, birtutas aqparattyq keńistik ornatýǵa jáne konvergenttik jýrnalıstıkanyń qalyptasýyna jol ashatyn bolady.
«Atyraý-Aqparat» medıaholdınginiń quramyna qazirgi ýaqytta oblystyq gazettermen birge birneshe aýdandyq gazetter biriktirilgen.
Aıta ketsek, «QazAqparat» HAA qazirgi tańda respýblıkalyq jáne oblystyq deńgeımen birge, aýdandarda da strıngerlik jelini damytýǵa mán berip keledi. Qazirdiń ózinde birneshe aýdanynda agenttiktiń shtattan tys tilshileri qyzmet etýde.
