«QazAqparat» HAA materıaly Silk Road Global News Awards syılyǵynyń úshinshi júldesin jeńip aldy
Bul týraly 19 jeltoqsan kúni Beıjińde ótken «Bir beldeý – bir jol» aqparat jelisiniń ekinshi otyrysynda málim boldy. «QazAqparat» halyqaralyq aqparat agenttigi bas redaktorynyń orynbasary Qanat Toqabaevtyń maqalasy «Jibek joly» (Silk Road Global News Awards) degen atpen alǵash ret berilip otyrǵan syılyqtyń «Kommentarıı» nomınatsııasy boıynsha úshinshi orynǵa ıe boldy.
Qazylar alqasy uıymdastyrý komıtetine alty nomınatsııa boıynsha kelip túsken 4 485 jumystyń ishinen aqtyq synǵa laıyqtaryn iriktegen. Іrikteý qorytyndysy boıynsha, «Bir beldeý – Bir jol» aqparattyq jelisi keńesiniń músheleri onlaın daýys berý arqyly qazaqstandyq basylymnyń jumysy úshinshi orynǵa laıyq dep tanyldy.
Foto:russian.people.com.cn
«Bir beldeý – bir jol» bastamasy búkil álem ekonomıkasyna jańa múmkindikter ashyp otyr. Tipti pandemııadan keıingi damýdy tejep jatqan geosaıası qaqtyǵystar da bul jobaǵa jańa serpin bere alady. Meniń oıymsha, bul álemdik ıntegratsııanyń baǵytyn shyǵysqa qaraı ıkemdep, Azııanyń jahandyq básekelestiktegi ornyn nyǵaıta alady. Árıne, álem qaýymdastyǵy úlken kórshimizdiń 2013 jyly Qazaqstan astanasynda jarııalanǵan bastamasyn muqııat qadaǵalap otyr. Qazaqstannyń álemdik saýda marshrýttarynyń jalpyǵa ortaq ıgilikterge qurylýy men jumys isteýine qosqan úlesi de álem nazarynda», - deıdi «QazAqparat» HAA bas redaktorynyń orynbasary Qanat Toqabaev.
Sondaı-aq ol osyndaı básekesi bıik ári bedeldi konkýrsqa qatysý ózi úshin úlken mártebe ekenin aıtady.
«QazAqparat» halyqaralyq agenttiginiń analıtıkalyq materıaly 2020 jyly birden 3 tilde – qazaq, aǵylshyn jáne qytaı tilderinde jarııalanǵan bolatyn.
Halyqaralyq kommýnıkatsııalar jónindegi «Jibek joly» (Silk Road Global News Awards) syılyǵyn «Bir beldeý – bir jol» aqparat jelisi (BRNN) quryp, uıymdastyryp otyr. Syılyq keńesine «Jenmın jıbao» tanymal álemdik basylym redaktsııasynyń basshylyǵy tóraǵalyq etedi.
Syılyqtyń maqsaty – «Bir beldeý – bir jol» bastamasyna qatysýshy elderdegi buqaralyq aqparat quraldarynyń kúsh-jigerin biriktirip, tájirıbe almasý.
Foto:kmc.exim.go.th
«Tyńǵylyqty reportaj» nomınatsııasy boıynsha Ulybrıtanııanyń ókili Krıs Raıt Qazaqstandaǵy «Qorǵas» halyqaralyq shekara mańy yntymaqtastyq ortalyǵyna arnalǵan materıalmen úzdik atandy. Ýgandalyq Múbarak Mýgabo «Kommentarıı» nomınatsııasynda birinshi oryn ıelendi. Reseı ókili Svetlana Tarasova «Baspasózge arnalǵan eń jaqsy foto» sanatynda jeńiske jetti. «Baspasózge arnalǵan úzdik vıdeo» nomınatsııasynda jeńisti NGC Network Asia, sondaı-aq CGTN jáne RTS resýrstary ózara bólisti.
«COVID-19-ǵa qarsy kúres» taqyrybyndaǵy qysqa rolıkter arasynda jeńis Kenııa men Mıanmanyń ókilderine berildi.
«Erekshe eńbegi úshin» nomınatsııasynda «Jibek joly dostary» klýbynyń basshysy, Pákistan – Qytaı ınstıtýtynyń tóraǵasy, Pákistan Senaty Qorǵanys komıtetiniń tóraǵasy, sondaı-aq, Beıbitshiliktiń bes qaǵıdasy» syılyǵynyń ıegeri Mýshahıd Hýsseın Saıed jeńimpaz atandy.
Aıta keteıik, «QR Prezıdentiniń Teleradıokesheni» KEAQ Qazaqstannyń eń iri medıa-kompanııalarynyń biri bolyp sanalady. Onyń quramyna: «Jibek Joly» telearnasynyń ulttyq jáne halyqaralyq redaktsııasy, Qazaqstandaǵy eń tarıhy baı «QazAqparat» halyqaralyq aqparat agenttigi jáne Derekti kıno ortalyǵy kiredi. «QazAqparat» HAA «Bir beldeý – bir jol» aqparat jelisiniń (BRNN) múshesi bolyp esepteledi.
«Bir beldeý, bir jol» aqparat jelisi (BRNN) Qytaı Halyq Respýblıkasynyń Tóraǵasy Sı Tszınpınniń bastamasymen 2017 jyldyń mamyrynda quryldy. 2022 jylǵy maýsymda 99 eldiń BAQ salasyndaǵy 213 uıymy «Bir beldeý, bir jol» aqparattyq jelisiniń músheleri bolyp tirkeldi.
