«QazAqparat» HAA qyzmetkerleri Ásem Shaıahmetovaǵa alǵashqylardyń biri bolyp qan tapsyrdy
ASTANA. QazAqparat - «QazAqparat» HAA qyzmetkerleri - úılestirý-anyqtamalyq bóliminiń bastyǵy jáne úılestirýshi Ajar Shákibaeva Jambyl oblysyndaǵy AN-2 ushaq apatynan aman qalǵan jalǵyz Ásem Shaıahmetovaǵa alǵashqylardyń biri bolyp qan tapsyrdy.
«Tańerteńnen bastap elordalyq qan tapsyrý ortalyǵynda Ásem Shaıahmetovaǵa qan tapsyrýǵa tilek bildirgen kóptegen adamdar jınaldy. Olardyń ishinde «Qazaqmys» korporatsııasynyń qyzmetkerleri de bar. Ásemge 4-shi oń rezýsty qan toby qajet», - dep atap ótti «QazAqparat» HAA úılestirý-anyqtamalyq bóliminiń bastyǵy Janar Bujymova.
Eske salsaq, keshe tańerteńgi saǵat 5.36-da sanıtarlyq avıatsııa Astanaǵa ushaq apatynan zardap shekken Ásem Shaıahmetovany jetkizdi. Aldyn ala dıagnozy - jabyq mı jaraqaty, mıy shaıqalǵan, oń san súıegi, oń jilinshigi synǵan, sol jilinshiginiń jabyq synyǵy. Ol jansaqtaý bólimine jatqyzyldy.
«Bastysy, onyń aman qalǵandyǵy», - dep atap ótti agenttik tilshisimen áńgimelesý barysynda Ásemniń ákesi.
29 jastaǵy Ásem Shaıahmetova «Qazaqmys» korporatsııasynyń «Balqashtústimetall» bas geology bolyp isteıdi.
Ushaq bortynda jeti adam bolǵan - «Qazaqmys» korporatsııasynan tórt adam jáne úsh ekıpaj múshesi. Alty adam kóz jumdy: tehnıkalyq damý departamentiniń dırektory G.T.Tóleýbaev, «Balqashtústimet» ÓB-iniń bas mehanıgi E.B.Ibraev, «Balqashtústimet» ÓB-iniń tehnıkalyq jáne ınvestıtsııalyq josparlaý bóliminiń bastyǵy U.H.Esmaǵanbetov, sondaı-aq barlyq ekıpaj músheleri - AN-2 komandıri V.G.Klıýshev, ekinshi ushqysh V.P.Savelev jáne bort mehanıgi V.I.Lıtvınov qaza tapty.
