«QazAqparat» HAA «Kazakhstan: Wise Power» fotokórmesin ótkizedi
Fotokórmede alǵash ret Qazaqstan Respýblıkasynyń Prezıdenti Nursultan Nazarbaevtyń jumys barysy túsirilgen fotosýretter qoıylady.
Fotokórme nege «Kazakhstan: Wise Power» dep atalady? «Wise power» - danalyq qýaty. Bul - Qazaqstannyń jáne onyń kóshbasshysy Elbasy Nursultan Nazarbaevtyń ustanǵan saıasatyna berilgen anyqtama.
Táýelsizdiktiń alǵashqy jyldarynan bastap-aq Prezıdent Nursultan Nazarbaevtyń basshylyǵyndaǵy Qazaqstan tatý kórshilik jáne ózara tıimdi yntymaqtastyqtyń jańa álemdik trendterin jasaı otyryp, beıbit damý jolyn tańdady.
Qazaqstannyń búgingi jahandyq ımıdji beıbit bastamalarǵa árqashan qoldaý bildirip, jan-jaqty kómek kórsetýge daıyn el retinde qalyptasty. Al Prezıdent Nazarbaev ultaralyq kelisimniń biregeı júıesin jasap, jahandyq saıasattaǵy dıplomatııanyń kemel, jańa formatyn júzege asyryp keledi. Buǵan qoǵamdyq sanany jańǵyrtýdyń «Rýhanı jańǵyrý» baǵdarlamasyn jatqyzýǵa bolady, óıtkeni básekege qabiletti Qazaqstan halqy kúlli álemge óziniń kemeldigi men danalyǵyn kórsetip otyr.
Kazakhstan: Wise Power fotokórmesiniń maqsaty - «QazAqparat» HAA tilshileriniń jáne qazaqstandyq aqparattyq agenttiginiń seriktesteri Aqordanyń baspasóz qyzmeti, «Anadoly» (Túrkııa), «AZERTADJ» (Ázerbaıjan), «BelTA» (Belarýs), «The Islamic Republic News Agency» (Iran), ÝzA (Ózbekstan), «Kabar» (Qyrǵyzstan), «Hovar» (Tájikstan) jáne «Ýkrınform» (Ýkraına) fotokameralarynyń obektıvi arqyly jańa álemge jańa Qazaqstannyń jańa álemdegi salıqaly belsendiligin tanytý bolyp otyr.
Kórme Qazaqstan Respýblıkasynyń Aqparat jáne baılanys mınıstrligi, «QazAqparat» halyqaralyq aqparattyq agenttiginiń uıymdastyrýymen «Han Shatyr» saýda-oıyn-saýyq ortalyǵynyń jáne «BI Group» qurylys holdınginiń atsalysýymen uıymdastyrylýda.
Kórmeni jeltoqsannyń 1-10 aralyǵynda saǵat 10: 00-den 23: 00-ge deıin tamashalaýǵa bolady. Kirý tegin.
