«QazAqparat» HAA Eýrazııalyq ekonomıkalyq komıssııa marapatyna ıe boldy
ASTANA. QazAqparat - Búgin Astanada ótip jatqan «Eýrazııalyq aptalyq» aıasynda Eýrazııalyq ekonomıkalyq komıssııa ıntegratsııalyq máseleler jaıynda qalam terbep júrgen birqatar BAQ ókilderin marapattady, dep habarlaıdy QazAqparat.
«Jemisti yntymaqtastyq úshin alǵysymdy bildiremin, aqparattyq keńistikte Sizge jáne Sizdiń áriptesterińizge shyǵarmashylyq tabystar tileımin»,-dep atap ótilgen Eýrazııalyq ekonomıkalyq komıssııa alqasynyń tóraǵasy Tıgran Sarkısıannyń quttyqtaýynda.
Gramotalarmen, alǵys hattarmen jáne arnaıy jasalǵan músinshelermen marapattalǵandar arasynda «QazAqparat» HAA bas redaktory Bıbınor Sultanqyzy da bar.
Munymen qosa, «Habar» telearnasy, «Kazahstanskaıa pravda» gazeti, «Ekspert Kazahstan» jýrnaly, «Delovaıa Evrazııa» saraptamalyq resýrsy, «Kabar» agenttigi, «Rossııa segodnıa» HAA, «Belta» agenttigi, Belarýs Respýblıkasynyń ulttyq teleradıokompanııasy, «Rossııa-24» telearnasy, «MIR» telearnasy, «Interfaks» agenttigi, «TASS» agenttigi, «KommersantЪ», «ArmInfo» agenttigi jáne EAEO aýmaǵyndaǵy ózge de BAQ-tar marapatqa ıe boldy.
Budan buryn habarlanǵandaı, osy aptada jyl saıynǵy «Eýrazııalyq aptalyq» halyqaralyq forým jumysyn bastady. Sharany Eýrazııalyq ekonomıkalyq odaq elderi uıymdastyryp otyr.
Forýmǵa qatysý úshin Astanaǵa álemniń 42 elinen memlekettik bılik organdarynyń, iskerlik toptar men bıznes qoǵamdastyqtyń ókilderi keldi. Jalpy sharaǵa eki myńnan astam adam jınaldy. «Eýrazııalyq aptalyq» baǵdarlamasyna 30-dan astam pikir almasý sharalary qamtylady. Osy rette EAEO-nyń ortaq naryǵyna qatysty ekonomıkanyń 13 salasyndaǵy máseleler talqylanady. Paneldik talqylaýlar, semınarlar men dóńgelek ústel otyrystarynda 17 elden kelgen 300-den astam spıker sóz sóıleıdi dep kútilýde.
