«QazAqparat» HAA bas dırektory QR men QHR gýmanıtarlyq yntymaqtastyǵyndaǵy ilgerileýdi atap ótti
NANKIN. QazAqparat - Nankınde alǵash ret ótip jatqan Jibek jolynyń BAQ yntymaqtastyǵy forýmynda «QazAqparat» HAA bas dırektory Ásel Tólegenova Qazaqstan men Qytaıdyń gýmanıtarlyq saladaǵy áriptestigi týraly aıtty, dep habarlady Qytaıdan «QazAqparat» HAA menshikti tilshisi.
«Sońǵy jyldary eldiń gýmanıtarlyq yntymaqtastyǵynda belgili bir ilgerileý baıqalady - eki eldiń ǵalymdary, mádenıet pen óner qaıratkerleri arasynda yntymaqtastyq artýda. Qytaıdaǵy qazaqstandyq stýdentter sany 11 myńnan asady. Bul QHR-daǵy shetel stýdentteri sanynyń barynsha joǵary kórsetkishteriniń biri bolyp tabylady. Qazaqstanda 4 Konfýtsıı ınstıtýty jumys isteıdi», - dedi ol «BAQ halyqtardyń ózara túsinistigin qalaı nyǵaıtady» atty paneldi sessııada sóz sóıleý barysynda.
«QazAqparat» HAA bas dırektory ótken jyldyń aıaǵynan bastap Qytaıda Qazaqstan Ortalyqtary - Qazaqstan tarıhy, tili jáne mádenıetin alǵa jyljytý jáne taratý úshin jarııa dıplomatııa salasyndaǵy fýnktsıonaldyq alań sany artyp jatqanyn habarlady. Sonymen, QHR-daǵy alǵashqy Qazaqstandyq ortalyq Shanhaı shet tilderi ýnıversıtetiniń janynan 2015 jylǵy 16 qarashada ashylǵan. Ekinshisi - sol jyly 13 jeltoqsanda Beıjiń shet tilderi ýnıversıteti janynan, úshinshisi - 2016 jylǵy 8 qańtarda Dalıansk shet tilderi ýnıversıteti janynan ashyldy. 2017 jyldyń birinshi jartysynda Sıan shet tilderi ýnıversıteti janynan osyndaı ortalyq ashý jospalanýda.
«Mundaı serpin qytaı ǵylymı ortasy men qoǵamdastyq ókilderi tarapynan Qazaqstanǵa qyzyǵýshylyqty arttyrady. Muny Qytaı Ortalyq televıdenıesinen «Elbasy joly» atty QR Prezıdenti N. Nazarbaev týraly trıologııany keńinen kórsetkeninen bilýge bolady. Ekinshi jaǵynan Qazaqstan halqynda «Bir beldeý, bir jol» strategııasy, «Sandyq Jibek joly» jáne «Aqparattyq Jibek joly» atty baǵdarlamalardy iske asyrýǵa baılanysty Qytaıdaǵy oqıǵalarǵa qyzyǵýshylyqtyń artqanyn atap ótken jón», - dep aıtyp ótti ol.
Ásel Tólegenova búginde Qazaqstan aýmaǵynda «Jenmın jıbao» jáne «Gýanmın jıbao» gazetteri, «Sınhýa» AA, Halyqaralyq qytaı radıosy, «CCTV» ortalyq Qytaı televıdenıesiniń bólimsheleri jumys isteıtinin eske saldy. «Jenmın hýabao» baspasy bıylǵy jyldan bastap qazaq jáne orys tilderinde «Jibek joly - Revıý» jýrnalyn shyǵara bastaıdy.
«Qazaqstandaǵy, tutastaı Ortalyq Azııadaǵy jetekshi qytaılyq BAQ áriptesteri, basty jáne eski dostarynyń biri «QazAqparat» HAA bolyp tabylady. Ótken jyly 95-ke keldik. Búginde óńirden Qytaıda menshikti tilshiler pýnkti bar biz ǵana. Josparymyz - qytaılyq áriptestermen praktıkalyq yntymaqtastyqty tereńdetýdi, keńeıtýdi jalǵastyrý. Atap aıtqanda, taıaý ýaqytta «Jenmınvanmen» ózara negizde agenttikterimizdiń jańalyqtarymen arnaıy aıdar ashýǵa nıettimiz», - dedi ol.
«QazAqparat» HAA bas dırektory shara qatysýshylary EKSPO-2017 kórmesine shaqyra otyryp, Qazaqstan men Qytaı arasyndaǵy saıası, saýda-ekonomıkalyq, qarjy-ınvestıtsııalyq yntymaqtastyq jaıly qysqasha aıtyp ótti.
«Kelesi jyl Qazaqstanda Qytaıdyń týrızm jyly bolyp jarııalandy. Astanaǵa EKSPO-ǵa qytaılyq týroperatorlardyń aldyn ala ótinimi boıynsha QHR-dan jarty mıllıonnan astam týrıster keledi. Osy oqıǵanyń arqasynda Qytaıda jáne basqa da «Bir beldeý, bir jol» elderinde adamdar Qazaqstan jaıly keńinen tanysa túsedi», - dedi Ásel Tólegenova.
