«QazAqparat» HAA Argentınanyń iri aqparat agenttigimen Yntymaqtastyq memorandýmyna qol qoıdy

ASTANA. QazAqparat - Argentına astanasy Býenos-Aıreste Qazaqstannyń memlekettik aqparat agenttigi «QazAqparat» HAA men Argentınanyń iri aqparat agenttigi Telam arasynda Yntymaqtastyq týraly memorandýmǵa qol qoıý rásimi ótti.

Qujatqa Qazaqstan tarapynan Qazaqstannyń Brazılııadaǵy elshisi jáne Argentınadaǵy elshi qyzmetin qosa atqarýshy Qaırat Sarjanov, Argentına tarapynan Telam ulttyq aqparat agenttiginiń prezıdenti Rodolfo Poýsa qol qoıdy. Rásimde Qazaqstan elshisi jetekshi Telam aqparat agenttigi qazaqstandyq jetekshi BAQ ókilderiniń birimen yntymaqtastyq ornatqan Latyn Amerıkasyndaǵy alǵashqy aqparat quraldarynyń biri ekenin atap ótti.

«Osy memorandýmnyń arqasynda elderimiz BAQ-tarynyń arasynda ekijaqty Qazaqstan-Argentına áriptestigin damytýǵa uzaq ýaqyt qyzmet etetin tabysty yntymaqtastyq ornatamyz dep úmittenemin», - dedi qazaqstandyq dıplomat. Qaırat Sarjanov QazAqparat pen Telam arasyndaǵy ózara yqpaldastyq qoǵamdyq sanany jańǵyrtý baǵdarlamasy aıasynda Qazaqstan mádenıetin Argentınada belsendi túrde nasıhattaýǵa septigin tıgizetinin tilge tıek etti.

Eske sala ketsek, QR Aqparat jáne kommýnıkatsııalar mınıstri Dáýren Abaev shilde aıynda Argentınanyń buqaralyq aqparat quraldary jáne qoǵamdyq sana federaldyq júıesi mınıstri Ernan Lombardımen (Hernan Lombardi) kezdesip, taraptar yntymaqtastyq týraly kelisim jasasqan bolatyn. Vedomstvolar basshylary qol qoıǵan memorandým jańalyqtar, derekti fılmder almasý, sondaı-aq birlese kadrlar daıarlaý múmkindikterin beredi.