«QazAqparat» HAA aqparat alańyndaǵy kóshbasshylyǵyn nyǵaıta bermek - Asqar Ýmarov
ASTANA. QazAqparat - «QazAqparat» Halyqaralyq aqparat agenttigi aqparat aıdynyndaǵy kóshbasshylyǵyn nyǵaıta bermek. Bul týraly búgin Ortalyq kommýnıkatsııalar qyzmetindegi baspasóz máslıhatynda «QazAqparat» HAA Bas dırektory Asqar Ýmarov málim etti, dep habarlaıdy QazAqparat.
Shara barysynda «QazAqparat» agenttiginiń 2017 jylǵy qyzmet qorytyndylary men 2018 jylǵa arnalǵan josparlary jarııa etildi.
«Memlekettik aqparat agenttigi bolǵannan keıin, 2017 jyldyń qorytyndysyn jarııalap, 2018 jylǵa josparlarmen bólisýdi jón kórdik. Byltyrǵy jyl «QazAqparat» úshin óte jaqsy boldy dep aıtýǵa bolady. Bul turǵyda Aqparat jáne kommýnıkatsııalar mınıstrligi tarapynan eleýli qoldaý jasaldy. 2017 jyly «QazAqparat» saıtyn paıdalanýshylar 21 paıyzǵa ósip, bizdiń naqty aýdıtorııamyz, ıaǵnı biregeı paıdalanýshylar 12 mıllıonǵa jetti», - dep toqtaldy Asqar Ýmarov.
Sonymen qatar Bas dırektor agenttik shetelge aqparat taratýǵa da erekshe mán berip otyrǵanyn aıta kele, «QazAqparat» jańalyqtary tórt tilde 227 elge taralyp jatqanyn jetkizdi.
«Tóte jazý nusqasy da jaqsy jolǵa qoıylǵan. Osy oraıda, negizgi aýdıtorııamyz Qytaı men Iranda. Sáıkesinshe, bul baǵyttaǵy kórsetkishter artyp keledi», - dep naqtylady A. Ýmarov.
Aıta keteıik, áleýmettik jelide agenttiktiń paraqshasyna jazylýshylar sany úsh esege deıin artty. 2017 jyly 18 taqyryptyq jobalar, 4 web-joba júzege asty. Sondaı-aq byltyr «Fotobank» (photobank.inform.kz) qurylyp, onda tarıhı fotosýretter jınaqtaldy, qazirgi zamanǵy fotosýretterdiń jańa bazasy qalyptasty.
«Bizde jańa formattar iske qosylyp jatyr. Onyń ishinde byltyr alǵashqy ret «KazLiveInform» vıdeoaqparattardyń jańa formaty boıynsha jumys bastaldy. Vıdeokontent úlesi 10 paıyzǵa ósti. Munymen qosa, Sport.Inform.kz sporttyq portaly iske qosylǵanyn eske salǵym keledi jáne ol óz kezeginde tanymal bola bastady. Joba ınvestorlar qarjysy esebinen júzege asyryldy, ıaǵnı buǵan memlekettik qarjy jumsalmady», - dedi ol.
2017 jyly sheteldik aqparat agenttikterimen 18 memorandýmǵa qol qoıyldy. Sheteldik seriktester saıtyna 120-dan astam materıal ornalastyrylyp, áriptestermen kontent jáne banner almasý atqaryldy.
«Rýhanı jańǵyrý» baǵdarlamasy boıynsha «QazAqparat» biraz jumys atqardy. Birqatar arnaıy jobalardy iske asyrdyq. Atap aıtqanda, aldaǵy jyly óz qyzmetimizdi keńeıtýdi kózdep otyrmyz. Bul turǵyda aǵylshyn jáne qytaı redaktsııalarynyń kontentin arttyrý josparlanýda. Sebebi aýdıtorııalyq úlken suranys bar. Salystyrmaly túrde aıtsaq, «QazAqparat» saıtyn paıdalanýshylar qatarynda tórtinshi orynda Ýkraına bolsa, búginde bul orynǵa Frantsııa kóterildi. Negizi, aǵylshyn tilindegi Qazaqstannan taralǵan aqparattarǵa qyzyǵýshylyq artyp kele jatqanyn ańǵardyq. Osy oraıda kún saıyn tıisti monıtorıng júrgizip kelemiz», - dedi Asqar Ýmarov.
