«QazAqparat» BAQ ókilderi arasyndaǵy respýblıkalyq týrnırde «Bes asyqtan» bas júldeni oljalady (FOTO)
ASTANA. QazAqparat - Elordadaǵy «Han shatyr» oıyn-saýyq saýda ortalyǵynda BAQ ókilderi arasynda «Asyq atýdan» respýblıkalyq týrnır ótti.
Ulttyq oıyn túrinen ótken sporttyq sharaǵa respýblıkalyq 8 buqaralyq aqparat quralynyń ókilderi qatysty. Tartysty ótken saıys nátıjesinde qyzdar arasyndaǵy «Bes asyq» oıynynan «QazAqparat» halyqaralyq aqparat agenttiginiń qyzmetkeri Saıagúl Jarylqasyn bas júldeni jeńip aldy. Al erler arasynda ótken «Asyq atý» saıysynda birinshi oryn "Astana telearnasy" qyzmetkerlerine buıyrdy.
«Kóshpendilerdiń kóne oıyny - «Asyq atýdyń» tarıhy úsh myń jyldan asyp jyǵylady. Sondyqtan da búgingi kúni de bul ulttyq oıynnyń óz ózektiligin joımaýy qýantady. Bul oıyndy barlyǵy, ıaǵnı eńbektegen baladan eńkeıgen qartqa deıin biledi», - dedi «Kazkontent» AQ basqarmasynyń tóraǵasy, «Asyq atý» respýblıkalyq qaýymdastyǵynyń prezıdenti Aıdos Qydyrma.
Onyń atap ótýinshe, búginde ózi basqaratyn qaýymdastyqtyń elimiz boıynsha jetpiske jýyq úıirmesi jumys isteıdi.
«Biz jyl sońyna deıin «Asyq atýdan» keminde toǵyz respýblıkalyq jáne halyqaralyq týrnır uıymdastyrýdy josparlap otyrmyz. Astanada búgingi ótip jatqan týrnır osy sport túrin damytýdaǵy alǵashqy qadamymyz bolmaq», - dedi A.Qydyrma.
Aıta keteıik, jarysqa «QazAqparat» halyqaralyq aqparat agenttigi, «Egemen Qazaqstan», «Kazahstanskaıa pravda» respýbılkalyq gazetteri, «Astana», «Qazaqstan» telearnalary, «Bas redaktorlar klýby» QB, «Qazkontent» AQ, QR Prezıdenti janyndaǵy Ortalyq kommýnıkatsııalar qyzmeti qyzmetkerleri qatysty.
