QazAqparat-Anons: Shildeniń 13-i men 18-i aralyǵyndaǵy oqıǵalardyń kúntizbesi
ÚKІMET
Shildeniń 13-i kúni saǵat 10.00-de QR Úkimetiniń selektorlyq otyrysy ótedi.
Shideniń 13-i kúni saǵat 15.00-de Táýelsizdik saraıynda K.Másimov jáne J.Túımebaevtyń qatysýymen 51-shi Halyqaralyq matematıkalyq olımpıadanyń saltanatty jabylýy bolady.
Shildeniń 13-i kúni Astana qalasy ishki ister departamentiniń aptalyq brıfıngisi ótedi.
Shildeniń 16-sy men 17-si kúnderi Almatydaǵy Aqbulaq kýrorttyq aımaǵynda EQYU syrtqy ister mınıstrleriniń beıresmı kezdesýi ótedi.
PARLAMENT
QOǴAM
Maýsymnyń 1-inen bastap elimizde jyl saıynǵy «Skýter» sharasy bastalyp, ol shomylý maýsymy aıaqtalǵanǵa deıin jalǵasýda.
Maýsymnyń 1-inen bastap «Qazkommertsbank» AQ memlekettik baǵdarlama boıynsha "Samuryq-Qazyna" ulttyq ál-aýqat qory esebinen ıpotekalyq nesıeleýdi qaıta qarjylandyrýdy jańǵyrtty.
Shildeniń 1-inen bastap Keden odaǵynyń biryńǵaı sertıfıkaty engizildi.
SPORT
Shildeniń 16-sy men 18-i aralyǵynda Balqash kóliniń jaǵalaýynda«Bike Fest.kz Balqash-Nursaıa 2010» motosaıahatshylardyń tórtinshi halyqaralyq festıvali ótedi.
Shildeniń 17-si kúni Aqtaý qalasynda «Qazaqstan boks federatsııasynyń Kýbogy» úshin boksshylardyń ishki aımaqtyq chempıonaty ótedi.
ASTANA
Shildeniń 13-i kúni «Báıterek» monýmentiniń alańynda múmkindigi shekteýli qazaqstandyq balalar bezendirgen eki aıýdyń tanystyrylymy bolady.
Shildeniń 13-i kúni «Nomad» shytyrman oqıǵaly kınolardyń shaǵyn festıvali» atty baspasóz konferentsııa ótedi.
Shildeniń 13-i kúni keshki saǵat 19.00-de «Nomad» shytyrman oqıǵaly kınolardyń shaǵyn festıvali» ashylady.
Shildeniń 12-si men 17-si aralyǵynda QR Prezıdenttik mádenıet ortalyǵynda «Mereıtoı ıeleri» atty kórme ótedi.
Maýsymnyń 29-y men qyrkúıektiń 1-i aralyǵynda QR Tuńǵysh Prezıdentiniń murajaıynda «Nazarbaev jáne Qazaqstan» atty kórme ótedi.
Maýsymnyń 28-i men shildeniń 23-i aralyǵynda elordanyń 12 jyldyǵyn atap ótý aıasynda «Qazaqstan Astanasy» atty derekti kórme ótedi.
ALMATY
Shildeniń 13-i kúni Almatyda «Bolashaqqa degen senim - árbir qazaqstandyqqa!» atty avtojarystyń qorytyndylary boıynsha baspasóz konferentsııasy ótedi.
Shildeniń 13-i kúni «Ortalyq Azııa jáne Ońtústik Kavkaz keden jáne shekara qyzmetteriniń jumysyndaǵy tutastyqtyń kómegi» atty semınar ótedi.
ShІLDENІŃ 13-І, SEISENBІ
Shaǵban aıynyń 1-shi juldyzy (Musylman meıramy).
Shaǵban - ramazan aıynyń aldyndaǵy, Radjab aıynan keıin keletin musylman aı kúntizbesiniń segizinshi aıy. Shaǵban aıynyń ataýy «tashaǵba» sózinen shyqqan «taratý» degen maǵynany bildiredi, bul aıda Meıirim taratylady. Shaǵban aıynda jasalǵan barlyq jaqsylyqtar 70 ese kóbeıedi. Shaǵban aıyn taǵy da Paıǵambar aıy dep ataıdy. Islamdaǵy birinen keıin biri keletin úsh qasıetti aıdyń ekinshisi. Kóbinese bul aıdyń atyna «qadirli» degen maǵynany bildiretin «mýazzam» sózin qosady.
Ulttyq qaýipsizdik komıteti kúni. 1992 jyly dál osy kúni Elbasy N.Nazarbaevtyń Jarlyǵymen Qazaqstan Respýblıkasynyń Ulttyq qaýipsizdik komıteti quryldy.
OQIǴALAR
5 jyl buryn (2005) Elbasy Nursultan Nazarbaev Býrabaı demalys aımaǵyndaǵy «Kókshetaý» saıabaq-qonaq úıiniń ashylý rásimine qatysty.
Qonaq úı kesheni Jeke Batyr taýynyń etiginde, Shortan kóliniń ońtústik-batys jaǵalaýynda ornalasqan. 4 qabatty ǵımaratta 33 jaıly nómir bar. Munda otbasymen demalýǵa, sondaı-aq keńester, semınarlar jáne máslıhattar uıymdastyrýǵa bolady. Qonaq úıde 20 metrlik basseın, trenajer zaly, bılıard klýby, sondaı-aq, zamanaǵa saı jabdyqtalǵan kınozal bar.
3 jyl buryn (2007) Qaraǵandynyń burynǵy Narkomhoz ǵımaratyna Qazaq KSR eńbek sińirgen shahteri, memleket qaıratkeri Faızýlla Serǵazınge arnalǵan memorıaldy taqta ornatyldy.
Faızýlla Serǵazın (1910-1971) Máskeý taý-ken ınstıtýtyn, Kómir ónerkásip akademııasyn bitirgen soń, kóp jyldar boıy Qaraǵandynyń kómir basseıininde qyzmet atqardy. Óndiriste qyzmet atqaryp, ǵylymı jumyspen aınalysty jáne óziniń tehnıkalyq bilimin nasıhattady. Memleket aldyndaǵy eńbegi úshin KSRO-nyń eki ordenimen, bes medalimen, KSRO Joǵarǵy Keńesiniń bes Qurmet gramotasymen, ІІ dárejeli «Shahter dańqy» belgisimen marapattalǵan.
3 jyl buryn (2007) Tarazdyń oblystyq ulttyq qaýipsizdik organdarynyń tarıhı murajaıy ashyldy.
Kórmege Keńes ókimeti qurylǵan kezden osy kúnge deıingi Ulttyq Qaýipsizdik organynyń tarıhyn baıandaıtyn fotomaterıaldar, muraǵattyq qujattar, jeke zattar qoıyldy. 1936 jyly Jambyl oblysy ashyldy jáne naq sol jyly Qazaq KSR Mınıstrler Keńesi janynda Memlekettik Qaýipsizdik Komıteti Jambyl oblysy boıynsha bólimi alǵash quryldy. 1978 jyly bólim Qazaq KSR-niń Memlekettik Qaýipsizdik Komıteti Jambyl oblysy boıynsha basqarmasy dep ózgertildi. Qazaqstan egemendigin jarııalaǵannan keıin 1992 jylǵy shildeniń 13-de Qazaqstannyń Memlekettik Qaýipsizdik Komıteti Qazaqstan Respýblıkasynyń Ulttyq Qaýipsizdik Komıteti dep ózgertildi. 1996 jyly Ulttyq Qaýipsizdik Komıteti basqarmasynyń bazasynda Jambyl oblystyq departamenti quryldy. Ekspozıtsııanyń ortalyq bóligi elimizdiń ulttyq qaýipsizdik organdaryn qurýda úlken eńbek sińirgen, Qazaqstan Respýblıkasynyń Tuńǵysh Prezıdenti Nursultan Nazarbaevqa arnaldy. Osy jerde elimizdiń memlekettik nyshandary - Eltańba, Tý jáne Qazaqstan Respýblıkasy Ánuranynyń mátini, sondaı-aq Ata zań - elimizdiń Konstıtýtsııasy, Joldaýlar jáne Qazaqstan Respýblıkasy Prezıdentiniń kitaptary, zańnamalyq aktiler qoıylǵan.
1 jyl buryn (2009) Memleket basshysy Nursultan Nazarbaev «Eýrazııalyq ekonomıkalyq qoǵamdastyq múshe-memleketterinde ınvestıtsııalardy ózara qorǵaý jáne yntalandyrý týraly kelisimdi bekitý týraly» Qazaqstan Respýblıkasynyń Zańyna qol qoıdy.
ESІMDER
60 jyl buryn (1950-2007) jazýshy KÓBENTAEV Álibek dúnıege keldi.
Qaraqalpaqstan Respýblıkasynyń Núkis qalasynda týǵan. Hojeli pedagogıkalyq ýchılışesin, Reseıde Taganrog memlekettik pedagogıka ınstıtýtyn bitirgen.
1997 jyly tarıhı Otanyna oralyp, orta mektepterde muǵalim bolyp istegen.
«Nurly aǵys», «Kórgendi perzent» kitaptardyń, «Alaǵadaly kesh» áńgime, povest jınaqtarynyń, «Pán aptalyqtary», «Oqýshy-praktıkanttarǵa eskertpe» ǵylymı-ádistemelik kitapshalardyń avtory.
M.Dýlatovtyń «Qazaq qaıdan shyqqan?» kitabyn aýdarǵan.
45 jyl buryn (1965) Qazaqstan Respýblıkasy Respýblıkalyq ulan Qolbasshysynyń Birinshi orynbasary, general-maıor ÚKІBAEV Ermek Eleýhanuly dúnıege keldi.
Ońtústik Qazaqstan oblysynyń Kentaý qalasynda týǵan. Almaty joǵary jalpy áskerı komandalyq ýchılışesin, L.Gýmılev atyndaǵy Eýrazııalyq ulttyq ýnıversıtettin Dıplomatııalyq akademııasyn bitirgen.
1986-1988 jyldary - Germanııadaǵy Keńes Áskerleriniń Toby 2 gvardııalyq tank armııasy motoatqyshtar dıvızııasy motoatqyshtar polkiniń vzvod komandıri. 1988-1991 jyldary - Batys Áskerler Toby 2-gvardııalyq tank armııasy motoatqyshtar dıvızııasy motoatqyshtar polkiniń rota komandıri. 1991-1992 jyldary - Batys Áskerler Toby 2-gvardııalyq tank armııasy motoatqyshtar dıvızııasy motoatqyshtar polkiniń motoatqyshtar batalonynyń shtab bastyǵy - komandırdiń orynbasary. 1992-1995 jyldary - Respýblıkalyq ulan Brıgadasy shuǵyl batalon shtabynyń bastyǵy-komandırdiń orynbasary, Respýblıkalyq ulan Brıgadasy Úkimettik kúzet batalonynyń komandıri. 1995-1996 jyldary - Respýblıkalyq ulan 0112 áskerı bóliminiń shtab bastyǵy-komandırdiń birinshi orynbasary. 1996-2002 jyldary Qazaqstan Respýblıkasy Prezıdentiniń Kúzet qyzmetinde áskerı qyzmetter atqardy 2002-2005 jyldary - Qazaqstan Respýblıkasy Prezıdentiniń Kúzet qyzmeti Birinshi departamenti bastyǵynyń orynbasary. 2005-2006 jyldary - Qazaqstan Respýblıkasy Prezıdentiniń Kúzet qyzmeti bastyǵynyń orynbasary - Birinshi departament bastyǵy qyzmetterin atqarǵan. Qazirgi qyzmetinde - 2006 jyldyń qańtarynan.
2-dárejeli «Aıbyn» ordenimen jáne mereıtoılyq medaldarmen marapattalǵan.
ShІLDENІŃ 14-І, SÁRSENBІ
OQIǴALAR
13 jyl buryn (1997) Qazaqstan Respýblıkasy Prezıdenti N.Á.Nazarbaevtyń Jarlyǵymen «Qazatomónerkásip» Ulttyq atom kompanııasy quryldy.
5 jyl buryn (2005) Almatyda Ortalyq Azııadaǵy adam quqyǵyn qorǵaıtyn Musylman komıtetiniń bas keńsesi ashyldy.
Komıtet músheleri bolyp zańgerler, teologtar jáne dinı qaýym ókilderi tirkeldi. Uıymnyń maqsaty azamattardyń ultyna, dinine jáne saıası tıistiligine qaramastan quqyǵyn qorǵaý bolyp tabylady.
1 jyl buryn (2009) Memleket basshysy turǵyn úı qurylysyna úlestik qatysý salasyndaǵy qatynastardy retteýge arnalǵan jáne qurylys salýshylardyń qarjylyq turaqtylyǵyna talapty arttyrýdy qarastyratyn jáne úleskerlerdiń quqyǵyna kepildikti kúsheıtýge baǵyttalǵan «Qazaqstan Respýblıkasynyń keıbir zańnamalyq aktilerine turǵyn úı qurylysyna úlestik qatysý máseleleri boıynsha ózgerister men tolyqtyrýlar engizý týraly» Zańǵa qol qoıdy.
1 jyl buryn (2009) E.Bóketov atyndaǵy Qaraǵandy memlekettik ýnıversıtetiniń arheologtar ekspedıtsııasy Nura ózeniniń ortańǵy aǵymynyń tusynan saq dáýiriniń jádigerlerin tapty.
Samarqand jáne Tegisjol aýyldarynyń arasyndaǵy Temirqash shatqalynda júrgizilgen qazba jumystarynyń nátıjesinde temir qoramsaq, jebeniń ushy, jas sarbaz belbeýiniń aıylbasy sııaqty zattar tabylǵan. Arheologtar bul jádigerlerge 2 myń jyldan asady dep paıymdady.
ESІMDER
90 jyl buryn (1920-2003) - ǵalym, fızık, tehnıka ǵylymdarynyń doktory, professor, Qazaq KSR Ǵylym akademııasynyń korrespondent múshesi POMERANTsEV Gleb Borısovıch dúnıege keldi.
Reseı Federatsııasynda týǵan. Sankt-Peterbor memlekettik ýnıversıtetin bitirgen.
1947-1976 jyldary - Aqtaý energokombınatynyń ınjener-fızıgi, bólim bastyǵy, ǵylymı jetekshiniń orynbasary, bas ınjenerdiń ǵylymı jónindegi orynbasary. 1976 jyldan - Qazaq polıtehnıkalyq ınstıtýtynyń (qazirgi Qanysh Sábpaev atyndaǵy Qazaq ulttyq tehnıkalyq ýnıversıteti) Aqtaý qalasyndaǵy bólimshesinde ǵylymı qyzmetter atqarǵan.
Negizgi ǵylymı eńbekteri ıadrolyq reaktorlardyń ónimdiligin arttyrý, jyldam neıtrondy qýatty reaktorlardy jasaý jáne jetildirý, taǵy basqa máselelerge arnalǵan. 235 ǵylymı eńbektiń, 6 ónertabystyń avtory.
Lenın jáne KSRO Memlekettik syılyqtyń laýreaty. 2 ret Eńbek Qyzyl Tý ordenimen, kóptegen medaldarmen marapattalǵan.
45 jyl buryn (1965) Qazaqstan Respýblıkasy Tótenshe jaǵdaılar jónindegi mınıstrliktiń Órtke qarsy qyzmet komıtetiniń tóraǵasy ÁÝBÁKІROV Serik Ǵabdollauly dúnıege keldi.
Shymkent qalasynda týǵan. KSRO ІІM Almaty órt-tehnıkalyq ýchılışesin,QR ІІM Almaty qalalyq joǵary tehnıkalyq ýchılışesin bitirgen.
Qazaqstan Respýblıkasy Tótenshe jaǵdaılar agenttigi «Órt sóndirýshi» Respýblıkalyq memlekettik kásipornynyń bastyǵynyń orynbasary, Qazaqstan Respýblıkasy Tótenshe jaǵdaılar mınıstrligi «Órt sóndirýshi» Respýblıkalyq memlekettik kásipornynyń bastyǵy, Tótenshe jaǵdaılar salasyndaǵy memlekettik baqylaý jáne qadaǵalaý jónindegi komıtetiniń Órt sóndirý jáne avarııalyq-qutqarý jumystary qyzmeti bóliminiń bastyǵy, Almaty qalasy Órtke qarsy qyzmet departamentiniń bastyǵy, Qazaqstan Respýblıkasy Tótenshe jaǵdaılar jónindegi mınıstrliktiń Órtke qarsy qyzmet komıteti tóraǵasynyń orynbasary qyzmetterin atqarǵan. Qazirgi qyzmetinde - 2008 jyldyń sáýirinen.
1, 2, 3-dárejeli «Órtke qarsy qyzmet organdaryndaǵy minsiz qyzmeti úshin» jáne «Qazaqstan Respýblıkasy tótenshe jaǵdaılar organdaryndarynyń ardageri» medaldarymen marapattalǵan.
ShІLDENІŃ 15-І, BEISENBІ
OQIǴALAR
5 jyl buryn (2005) Semeıdegi Qazaq qarjy-ekonomıkalyq ınstıtýtynyń ǵımaratynda Qabanbaı batyrdyń murajaıy ashyldy.
1 jyl buryn (2009) Astanadaǵy «Dıplomat» qonaq úıinde «Halyqaralyq baǵdarlamalar ortalyǵy» AQ men «Samuryq-Qazyna» Ulttyq ál-aýqat qory» AQ arasynda ózara yntymaqtastyq týraly memorandýmǵa qol qoıyldy.
1 jyl buryn (2009) Almatyda Qazaqstan Halyq bankinde iri avtomattandyrylǵan seıftik depozıtarıı ashyldy. Saltanatty rásimine Nıderlandy Koroldigi elshiliginiń, gollandııalyq Gunnebo kompanııasynyń ókilderi jáne «Qazaqstan Halyq banki» AQ-nyń basshylyǵy qatysty.
Avtomattandyrylǵan qoımaǵa uqsas bul seıftiń 417 uıashyǵy men joǵary deńgeıdegi 7 synypqa sáıkes keletin qorǵanys júıesi bar.
ESІMDER
95 jyl buryn (1915-1975) akter, Qazaq KSR-niń eńbek sińirgen ártisi SYZDYQOV Mántaı dúnıege keldi.
Aqmola oblysynyń Arshaly aýdanynda týǵan. Máskeý qalasyndaǵy Memlekettik teatr óneri ınstıtýtynyń akterler daıarlaıtyn qazaq stýdııasyn bitirgen.
1938 jyldan ómiriniń sońyna deıin M.Áýezov atyndaǵy Qazaq memlekettik drama teatrynyń quramynda qyzmet etti. 1942 jyldan Almaty teatr ýchılışesinde pedagogıkalyq qyzmetpen shuǵyldanǵan.
Alǵashqy oınaǵan róli - N.Pogodınniń «Myltyqty adam» dramasyndaǵy Zahar Zaharych. Budan keıin ár alýan rólderde oınap, óziniń ótkir minezdi akter ekenin baıqatty. Basty rólderi: Bójeı, Jantyq, Esen, Aldabergen, Panfılov, Sársen.
«Qurmet belgisi» ordenimen, medaldarmen marapattalǵan.
95 jyl buryn (1915-1978) aqyn, aýdarmashy BORANBAEV Qabyl dúnıege keldi.
Pavlodar oblysynyń Baıanaýyl aýdanynda týǵan. Petropavl pedagogıkalyq tehnıkýmyn, Abaı atyndaǵy Qazaq ulttyq pedagogıkalyq ýnıversıtetin bitirgen. Uly Otan soǵysyna qatysqan.
Qaraǵandy oblysynyń, Balqash qalasynyń mektep muǵalimi, dırektory, Túrkistan pedagogıkalyq ýchıleşesi dırektorynyń orynbasary, QazTAG redaktory, «Pıoner» (qazirgi «Aq jelken») jýrnaly redaktorynyń orynbasary qyzmetterin atqarǵan.
«Dáýren», «Balalar shattyǵy», «Ant», «Dos otrıad», «Tapqyr bala», «Dán darııa» óleńder jınaǵynyń avtory. Orys aqyndary B.Nekrasovtyń, V.Maıakovskııdiń, K.Sımonovtyń, shyǵarmalaryn qazaq tiline tárjimalaǵan.
ShІLDENІŃ 16-Y, JUMA
OQIǴALAR
9 jyl buryn (2001) Eýrazııa ulttyq ýnıversıteti kitaphanasy negizinde «Otyrar kitaphanasy» ǵylymı ortalyǵy quryldy.
5 jyl buryn (2005) Aqtóbedegi Abaı atyndaǵy gúlzarda «Temirqazyq» rámizdik belgisiniń ashylý rásimi bolyp ótti.
Temirqazyq juldyzy erte kezde jolaýshylarǵa, qazaq dalasymen júrgen kerýenderge jol kórsetetin belgi bolǵan. Jańa «Temirqazyqta» jahannyń tórt buryshy, Aqtóbeniń geografııalyq málimetteri, qalanyń álemniń iri qalalarymen ara qashyqtyǵy kórsetilgen.
3 jyl buryn (2007) «G4 City» JShS Almaty-Qapshaǵaı kúre jolyna salynǵaly otyrǵan qanattas qalalardyń qyzmetin jetildirý úshin www.g4city.kz dep atalatyn saıtyn iske qosty. Saıtta sondaı-aq, túrli elektrondyq BAQ-tar men merzimdi baspasóz betterinde qanattas qalalarǵa qatysty jarııalaǵan materıaldar júıeli túrde berilip otyrylady. Qurylǵan kompanııanyń negizgi maqsaty - Úkimettiń qoldaýymen salynǵaly otyrǵan qalalardyń tolyqqandy damýyna atsalysý.
ESІMDER
50 jyl buryn (1960) Aqtóbe oblysy Yrǵyz aýdanynyń ákimi DÝANBEKOV Mırhan dúnıege keldi.
Aqtóbe oblysy Yrǵyz aýdany Yrǵyz aýylynda týǵan. Batys Qazaqstan aýylsharýashylyǵy ınstıtýtyn, Joǵary partııa mektebin bitirgen.
1983-1986 jyldary - Yrǵyz aýdandyq aýylsharýashylyq basqarmasynyń aǵa ınjeneri, tehnıka baqylaý ınspektsııasynyń bastyǵy, bas ınjeneri. 1986-1989 jyldary - aýdandyq komsomol komıtetiniń birinshi, ekinshi hatshysy. 1991-2003 jyldary Yrǵyz aýdanynda ár túrli salada jaýapty qyzmetterin atqarǵan. 2003-2005 jyldary - Qumtoǵaı aýyldyq okrýginiń ákimi. 2005-2006 jyldary Aqtóbe oblysy Yrǵyz aýdany ákiminiń orynbasary qyzmetterin atkarǵan. Qazirgi qyzmetinde - 2006 jyldyń qazan aıynan.
«Eren enbegi úshin», «Astana» medaldarymen marapattalǵan.
40 jyl buryn (1970) «Eksklıýzıv» Baspa úıi» JShS dırektory EJENOVA Qarlyǵash Kelerqyzy dúnıege keldi.
Almaty qalasynda týǵan. Ál-Farabı atyndaǵy Qazaq ulttyq ýnıversıtetin bitirgen.
Eńbek jolyn 1987 jyly tilshi retinde jastardyń «Gorızont» - «Órken» aptalyq gazetinen bastady. «Panorama» aptalyǵynnyń şolýshysy, Almaty qalasy ákimshiliginde baspasóz-hatshysy, Qazaqstan Respýblıkasynyń strategııalyq josparlar jáne reformalar agentiginiń strategııalyq josparlaý departamenti dırektorynyń orynbasary, «Golden Eagle Partners»kompanııasynda PR-departamentiniń jetekshisi, «East Print» JShS-nyń jáne «Eksklıýzıv» Baspa úıi JShS-nyń dırektory, «Bank TýranAlem» AQ-nyń Dırektorlar keńesi tóraǵasynyń kómekshisi, Brend-ofıstiń dırektory, «Bank TýranAlem» AQ-nyń basqarýshy dırektory qyzmetterin atqarǵan.
«Svıdetelı» kitabynyń avtory, «Dınamıka obşestvenno-polıtıcheskıh protsessov» monografııasynyń seriktes avtory, «Kazahstan: ıstorııa ekonomıcheskıh reform» kitabynyyń redaktory.
Qazaqstan Respýblıkasy Prezıdenti N.Á.Nazarbaevtyń jýrnalıstıka salasyndaǵy eki syılyǵynyń, Qazaqstan Jazýshylar odaǵy syılyǵynyń laýreaty.
ShІLDENІŃ 17-І, SENBІ
OQIǴALAR
3 jyl buryn (2007) Almatyda «Alpysbaı Qazyǵulov. Keskindeme» albomynyń tanystyrylymy ótti. A.Qazyǵulov - qazaqstannyń tanymal sýretshisi, ol abstraktsıonızm jáne sıýrrealızm janrynda jumys isteıdi, Almatyda turady jáne qyzmet ataqarady.
Sýretshi Qyzylorda oblysynyń Aralynda 1958 jyly dúnıege kelgen. Abaı atyndaǵy Qazaq pedagogıkalyq ınstıtýtynyń sýret-grafıka fakýltetin bitirgen. Qazaqstan Respýblıkasynyń Sýretshiler odaǵynyń múshesi, Belgııa, Nıderlandy, Japonııa, Reseı sáýlet óneriniń kásipker sheberlerdiń kórmesine qatysýshy. 2003 jyly álem ónerine qosqan úlesi úshin Eýropalyq óner ýnıtsııasynnyń Masarık atyndaǵy qurmet syılyǵynyń ıegeri.
1 jyl buryn (2009) Pavlodar oblysynyń Maı aýdanynda turǵyzylǵan asfalt-beton zaýyty iske qosyldy.
Saǵatyna 100 tonnadaı jol tósemin óndiretin jańa zaýytty «Dorremstroı PV» JShS salyp otyr. Kásiporyn Qazaqstannyń ıadrolyq ortalyǵyn damytý úshin mańyzy zor Aqsý-Kýrchatov respýblıkalyq trassasynda kúrdeli jóndeý jumystaryn júrgizip jatqan jolshylardy zamanaýı materıalmen tolyq qamtamasyz ete alady.
1 jyl buryn (2009) Almatyda Qazaqstannyń tuńǵysh Prezıdenti Nursultan Nazarbaevtyń basshylyǵymen qol jetkizgen jetistikterine arnalǵan «Qazaqstan: Ǵasyrlar asýynda» ǵylymı-pýblıtsıstıkalyq monografııasy jaryq kórdi.
Kitap avtory - Qazaqstan Respýblıkasynyń Ulttyq ǵylym akademııasynyń akademıgi, ekonomıka ǵylymdarynyń doktory, ál-Farabı atyndaǵy Qazaq ulttyq ýnıversıtetiniń professory Saǵyndyq Satybaldın. Jumys úsh taraýdan turady. «Qazaqstan keshe» dep atalatyn birinshi taraýda 1965-2006 jyldar aralyǵy qamtylsa, «Qazaqstan búgin» taraýynda - 2007-2008 jyldar, al «Qazaqstan erteń» dep atalatyn taraýynda 2009 jyldan bastap aldaǵy jyldar qamtylady.
Kitapta KSRO-nyń ydyraý sebepteri, óz odaǵyn qurý týraly úsh slavıan memleketiniń (Reseı, Belarýs, Ýkraına) sheshimderine qatysty oqıǵalar baıandalady.
Kitaptyń bastapqy tırajy - 1000 dana. Fotosýrettermen bezendirilgen 477 bettik basylym.
ESІMDER
70 jyl buryn (1940-2005) geolog-ǵalym, tehnıka ǵylymdarynyń doktory, professor, Qazaqstan Ǵylym akademııasynyń korrespondent-múshesi, Halyqaralyq tehnologııalyq jáne ınjınırıng ǵylym akademııasynyń akademıgi, Ýkraınanyń tehnologııalyq kıbernetıka ǵylym akademııasynyń akademıgi, Reseıdiń Jaratylystaný akademııasynyń akademıgi, Qazaqstan Respýblıkasy Mıneraldyq resýrstar akademııasynyń akademıgi, Halyqaralyq Aqparattaný akademııasynyń akademıgi VESELOV Vasılıı Vasıleevıch dúnıege keldi.
Ýkraınanyń Harkov qalasynda týǵan. Tambov joǵarǵy áskerı-avıatsıalyq ýchılışesin, T.Shevchenko atyndaǵy Kıev memlekettik ýnıversıtetin bitirgen.
Qazaq KSR Ǵylym akademııasy Gıdrogeologııa jáne geofızıka ınstıtýtynyń ınjeneri, aǵa ınjeneri, kishi ǵylymı qyzmetkeri, Qazaq KSR geologııa mınıstrliginiń tájirıbelik-ádistemelik ekspedıtsııasynyń bas geology, bas gıdrogeology,geologııalyq partııanyń bastyǵy, Qazaqstannyń Ý.Ahmedsafın atyndaǵy Ǵylym akademııasy Gıdrogeologııa jáne geofızıka ınstıtýtynyń dırektorynyń orynbasary, dırektory qyzmetterin atqarǵan.
Negizgi ǵylymı eńbekteri gıdrogeologııalyq obektiler men protsesterdiń matematıkalyq jáne aqparattyq modelin jasaý máselelerine arnalǵan.
«Geoınformatıka, sıstemno-ınformatsıonnyı podhod k zadacham modelırovanııa gıdrogeologıcheskıh obektov», «Gıdrogeologııa ı ohrana okrýjaıýşeı sredy gornorýdnyh raıonov Severnogo Kazahstana», «Proektırovanıesıstem», «Osnovy strýktýrnogo modelırovanııa gıdrosıstem», «Ekologo-melıoratıvnye problemy ıspolzovanııa vodnyh resýrsov basseına ozera Balhash», «Vodnye resýrsy Ilı-Balhashskogo basseına», «Gıdrogeologıcheskoe raıonırovanıe ı regıonalnaıa otsenka resýrsov podzemnyh vod Kazahstana» atty ǵylymı eńbekterdiń avtory.
«Qurmet belgisi» ordenimen jáne kóptegen medaldarmen marapattalǵan.
55 jyl buryn (1955) Qazaqstan Respýblıkasy Parlamenti Májilis depýtaty - Ekologııa máseleleri jáne tabıǵat paıdalaný komıtetiniń múshesi, ekonomıka ǵylymdarynyń magıstri ORAZALINOV Elýbaı Ataǵaıuly dúnıege keldi.
Pavlodar oblysy Pavlodar aýdany Efremovka kentinde týǵan. Pavlodar ındýstrııalyq ınstıtýtyn, Plehanov atyndaǵy Reseı ekonomıkalyq akademııasy janyndaǵy Menedjerler daıarlaý ortalyǵyn bitirgen.
Memlekettik qyzmetke deıin Pavlodar oblysynyń óndiristik salasy uıymdarynda basshylyq qyzmetter atqardy. Pavlodar oblysy Ekibastuz qalalyq ákimshiligi basshysynyń orynbasary, Pavlodar qalalyq ákimshiligi basshysynyń birinshi orynbasary, Ekibastuz qalasynyń ákimi, Pavlodar oblystyq jumyspen qamtýdy úılestirý jáne áleýmettik baǵdarlamalar basqarmasynyń bastyǵy, Soltústik Qazaqstan oblysy statıstıka basqarmasynyń bastyǵy, Pavlodar oblystyq avtomobıl joldary basqarmasynyń bastyǵy, Pavlodar oblysy ákimi basqarý isiniń bastyǵy, Pavlodar oblysy Aqsý qalasynyń ákimi qyzmetterin atqarǵan. Qazirgi qyzmetinde - 2007 jyldyń qyrkúıeginen.
«Eren eńbegi úshin», «Qazaqstan Respýblıkasy Konstıtýtsııasyna - 10 jyl», «Qazaqstan Respýblıkasy Parlamentine- 10 jyl», «Astana qalasyna - 10 jyl» medaldarymen jáne «Qalaǵa sińirgen eńbegi úshin» Qurmetti belgisimen marapattalǵan.
ShІLDENІŃ 18-І, JEKSENBІ
Metallýrg kúni. Qazaqstan Respýblıkasynyń Prezıdenti Nursultan Nazarbaevtyń 2003 jylǵy qarashanyń 15-degi Jarlyǵyna sáıkes jyl saıyn shildeniń úshinshi jeksenbisinde atap ótiledi.
1960 jyly Qaraǵandydaǵy metallýrgııa kombınatynda tuńǵysh domna peshi iske qosyldy, jáne sol kúni Qazaqstannyń tuńǵysh shoıyny alyndy. Bıyl Qazaqstan Magnıtkasynyń 50-jyldyq mereıtoıy atap ótiledi.
OQIǴALAR
15 jyl buryn (1995) Qazaqstan Respýblıkasynyń Prezıdenti N.Á.Nazarbaev Patenttik-tehnologııalyq aqparat jáne aldyńǵy qatarly tehnologııalyq qozǵalys jolyndaǵy barlyq tosqaýyldardy alyp tastaýǵa múmkindik bergen Eýrazııalyq patenttik konventsııany bekitý týraly Jarlyqqa qol qoıdy.
5 jyl buryn (2005) Oraldy M.Ótemisov atyndaǵy Batys Qazaqstan memlekettik ýnıversıtetiniń janynan kolledj ashyldy. Matematıka, fızıka, aqparattyq júıe, stanok grafıkasy, sándik-qoldanbaly óneri jáne halyq óneri mamandyqtary boıynsha oqytatyn bilim ordasynyń qurylý maqsaty pedagogıka mamandaryna sapaly bilim berý bolyp tabylady. Kolledjdi bitirgen túlekter oqýyn ýnıversıtette jalǵastyra alady.
1 jyl buryn (2009) Memleket basshysy Nursultan Nazarbaev «Qazaqstan Respýblıkasynyń keıbir zańnamalyq aktilerine jeke kásipkerlik máseleleri boıynsha ózgertýler men tolyqtyrýlar engizý týraly» jeke kásipkerlikti damytýǵa járdemdesetin qosymsha sharalar alýǵa, kásipkerliktiń memleketpen jáne qoǵammen ózara is-qımylyn nyǵaıtýǵa, sonyń ishinde memlekettik organdar tarapynan tekserýler júrgizýdi tártipke keltirýge baǵyttalǵan Qazaqstan Respýblıkasynyń Zańyna qol qoıdy.
ESІMDER
55 jyl buryn (1955) general-maıor, «Ońtústik» óńirlik áskerı qolbasshylyǵynyń qolbasshysy JARBOLOV Álıhan Birimjanuly dúnıege keldi.
Aqmola oblysynyń Qorǵaljyn aýdanynda týǵan. Sverdlovsk (qazirgi Ekaterınbýrg) qalasyndaǵy Sývorov ýchılışesin, Almaty qalasyndaǵy I.Konev atyndaǵy joǵary áskerı ýchılışesin, Máskeý qalasyndaǵy Frýnze atyndaǵy Áskerı akademııasyn bitirgen.
Qazaqstan Respýblıkasynyń Qarýly Kúshteri qurylǵan jyldary motoatqyshtar dıvızııasynyń komandıri, tank quramasynyń komandıri, armııa korpýsynyń komandıri, Qorǵanys mınıstriniń birinshi orynbasary, Shtab bastyǵy, «Ońtústik» áskerı qolbasshylyǵynyń qolbasshysy, Almaty joǵary áskerı ýchılışesiniń bastyǵy, Máskeý qalasyndaǵy TMD elderi qorǵanys mınıstrleri úılestirý keńesiniń qazaqstandyq turaqty ókili, Túrkııadaǵy Qazaqstan elshiliginiń áskerı ókili, Qurlyqtaǵy áskerler ınstıtýtynyń bastyǵy qyzmetterin atqarǵan. Qazirgi qyzmetinde - 2008 jyldyń qarashasynan.
2-dárejeli «Dańq» ordenimen, «Qazaqstan táýelsizdigine 10 jyl», «Qazaqstan Respýblıkasy Qarýly kúshterine 10 jyl», «KSRO Qarýly kúshterine 60 jyl», «KSRO-nyń Qarýly kúshterine 70 jyl» merekelik medaldarymen, 3-dárejeli «Úzdik qyzmeti úshin», «Áskerı qyzmeti úshin», KSRO-nyń 2- jáne 3-dárejeli «Úzdik qyzmeti úshin» medaldarymen marapattalǵan.
50 jyl buryn (1960) Qaraǵandy oblysy ákimi apparatynyń basshysy MUQATOV Qarıpolla Orynbekuly dúnıege keldi.
Qaraǵandy oblysy Egindibulaq aýdanynda týǵan. Qaraǵandy polıtehnıkalyq ınstıtýtyn, Qaraǵandy ekonomıkalyq ýnıversıtetin, Qazaqstan-Reseı ýnıversıtetin bitirgen.
Qaraǵandy qalasy Kırov aýdandyq ákimshiligi basshysynyń birinshi orynbasary, Kırov aýdany ákiminiń birinshi orynbasary, Oktıabr aýdany ákiminiń birinshi orynbasary, Qaraǵandy qalasyndaǵy «Aı» fırmasy JShS prezıdenti, Oktıabr aýdanynyń, Saran, Balqash qalalarynyń ákimi, Qaraǵandy oblysynyń jolaýshylar kóligi jáne avtomobıl joldary basqarmasynyń bastyǵy, Shahtınsk qalasy ákiminiń orynbasary, Qaraǵandy oblysy boıynsha «Sary-Arqa» AÓK UK» AQ ókildiginiń basshysy qyzmetterin atqarǵan. Qazirgi qyzmetinde - 2010 jyldyń mamyrynan.
