«QazAqparat» aqparat agenttigine jańa bas dırektor taǵaıyndaldy

ASTANA. QazAqparat - Qazaqstan Respýblıkasynyń Aqparat jáne kommýnıkatsııalar mınıstri Dáýren Abaev «QazAqparat» halyqaralyq aqparat agenttiginiń ujymyna jańa bas dırektor - Ásel Tólegenovany tanystyrdy.

Ujymmen kezdesý barysynda mınıstr aqparat agenttigin toǵyz jyl basqarǵan Dáýren Dııarovqa alǵys aıtyp, jańa basshynyń aldyna jańa mindetter júktedi.

Ásel Tólegenova ár jyldary aımaqtyq jáne respýblıkalyq telearnalarda jýrnalıst, jańalyqtar bóliminiń shef-redaktory qyzmetin atqarǵan. Tórt jyldan astam ýaqyt boıy Tengrinews.kz aqparat agenttiginiń shyǵarýshy redaktory, keıin aqparattyq portaldyń bas redaktory boldy.

«Jýrnalıster Áseldi óz isiniń naǵyz mamany, talantty basshy retinde  biledi. Jańa qyzmetinde oǵan eń myqty josparlaryn júzege asyrýǵa tilektespin. Búgingi tańda jańalyqtar resýrstarynyń arasyndaǵy báseke myqty, sondyqtan ǵasyrǵa jýyq tarıhy bar «QazAqparattyń» medıa salasyndaǵy reıtıngte top jarýy úshin kúrdeli modernızatsııa qajet», - dedi D.Abaev.