«QazAqparat» agenttigi 90 jyldyq mereıtoıynda sporttyq jetistikterimen de elendi
ASTANA. Tamyzdyń 16-sy. QazAqparat /Jasulan Amanbaıuly/ - «QazAqparat» Ulttyq kompanııasy» aktsıonerlik qoǵamy 90 jyldyq mereıtoıynda sporttyq jetistikterimen de elendi. Keshe, jeksenbide «Sport kúnine» arnalǵan jýrnalıster arasyndaǵy spartakıadada «QazAqparat» agenttigi birligi men tirligi jarasqan, súıinerlik úlgi ujym retinde erekshe iltıpatpen ataldy.
Q. Muńaıtpasov atyndaǵy Dostyq ortalyq stadıonda toǵyzqumalaq, shaǵyn fýtbol jáne kóńildi jarys sport túrlerinen ótken doda barysynda bizdiń agenttiktiń qyzmetkerleri buqaralyq aqparat quraldarynyń 14 ujymy ishinde «eń belsendi komanda» dep tanyldy.
Qazaqtyń tól oıyny, ulttyq sportymyz toǵyzqumalaq oıynynda agenttik tilshileri Marlan Jıembaı (3 oryn), Nurlan Qasymbekov (2 oryn) jáne Balaýsa Jolaýshydan (1 oryn) asar óren bolmady. Atalmysh sport túri boıynsha jalpy esepte «QazAqparat» agenttigi birinshi oryndy ıelendi.
Qazaq, orys, aǵylshyn, latyn jáne tóte jazý redaktsııalarynyń jýrnalısterimen qatar, «QazAqparat» Ulttyq kompanııasy» aktsıonerlik qoǵamynyń qyzmetkerleriniń barlyǵy derlik qatysty.
Qazirgi ýaqytta «QazAqparat» agenttigi álemdik aqparat keńistiginde elimizdiń laıyqty bedelin asqaqtatyp júr. Jedel de shapshań aqparat jasaýdy jetik meńgergen jýrnalıster sportta da jan aıamaıtyndyqtaryn kórsetti. Aqparat keńistigindegi básekede ǵana emes, buqaralyq sportta ózgelerdiń aldy bolýǵa umtylatynyn dáleldep, agenttiktiń 90 jyldyǵy mereıtoıynda laıyqty syı jasady.
QR Sport jáne týrızm mınıstrligi jáne Astana qalasynyń Týrızm, dene tárbıesi jáne sport basqarmasy buqaralyq sportty damytýǵa baǵyttalǵan is-sharasyna respýblıkalyq jáne aımaqtyq buqaralyq aqparat quraldarynyń ókilderi, jalpy sany 14 komanda qatysty.
