«Qazaqmys» - úıler qabyrǵasynyń jarylýyna taý-ken jumystarynyń qatysy joq
QARAǴANDY. QazAqparat - «Qazaqmys» korporatsııasy» JShS Qaraǵandy oblysy Jezqazǵan óńiri Vesovaıa aýyly mańyndaǵy jarylys jumystaryna qatysy pikir bildirdi, dep habarlaıdy QazAqparat.
Jarylys jumystaryna birqatar turǵyndar shaǵymdanǵan. Olar úıdiń syrtqy jaǵynda jaryqtar paıda bolǵanyn aıtyp, úıleri opyrylyp qulaıdy ma dep úreılenýde.
«Vesovaıanyń №10 mektebinde Jezqazǵan kentiniń ákimi Asylhan Sádýaqasov halyqqa esep berý kezdesýin ótkizdi. Oǵan «Qazaqmys» korporatsııasy» JShS ókilderi qatysty. Eń basty másele korporatsııa quramyna kiretin jaqyn mańdaǵy karerde taý-ken jumystarynyń qaıta bastalýyna oraı Vesovaıa turǵyndarynyń shaǵymy boldy», - dep habarlady kompanııanyń baspasóz qyzmetinen.
Kompanııadan habarlaǵandaı, kompanııa ókilderi, jergilikti atqarýshy organdar, prokýratýra, Indýstrıaldyq damý jáne óndiristik qaýipsizdik komıteti oblystyq departamenti ókilderinen qurylǵan komıssııa úılerdi tekserip shyqqan.
Nátıjesinde, mamandar karerdegi jarylys jumystarynyń turǵyn úıler men jerústi ınjenerlik kommýnıkatsııalarǵa qaýipsiz ekenin anyqtaǵan.
«Aýyl turǵyndaryna Jezqazǵan ken ornyn damytýdyń bas josparyna sáıkes, turǵyn úıler men jerústi nysandar taý-ken jumystary áser etpeıtin aımaqqa kóshiriletini túsindirildi. Kestege sáıkes, Vesovaıa aýylynyń turǵyndary 2018-2019 jyldary kóshiriledi. Sonymen birge, Sátbaev ákimdiginiń habarlaýynsha, Shákárim jáne Jumanov kóshelerindegi birqatar úı 2017 jyly kóshiriledi», - dep tolyqtyrdy «Qazaqmys» korporatsııasy» JShS baspasóz qyzmetinen.
Vesovaıa kentinde shamamen 5 myń adam turady.
