«Qazaqmys» toby «Samuryq-Qazyna» qoryna Ekibastuz GRES-1 stansysyndaǵy qatysý úlesiniń 50 paıyzyn satý jónindegi mámileniń aıaqtalǵanyn habarlady
ASTANA. Naýryzdyń 2-si. QazAqparat - «Qazaqmys» toby Ekibastuz GRES-1 stansysyndaǵy qatysý úlesiniń 50 paıyzyn «Samuryq-Qazyna» Ulttyq ál-aýqat qoryna satýyna qatysty jasasqan mámileniń aıaqtalǵany týraly habarlaıdy.
Mámileniń somasy 681 mıllıon AQSh dollaryn qurady.
Taraptar birlesken qadaǵalaý keńesin qurý, sondaı-aq «Qazaqmys» toby men «Samuryq-Qazyna» AQ arasyndaǵy operatsııalyq basqarýdyń almasýy jaıly shart jasasty. Bastapqy bes jylda elektr stansysyn «Qazaqmys» tobynyń menedjerleri basqaratyn bolady, delingen kompanııanyń baspasóz baıanynda.
Keıingi jeti jyl ishinde Top stansynyń negizgi generatsııalanýshy aktıvterin túrlendirýdi josparlap otyr. Investıtsııalardyń boljaldy aýqymy 1 mıllıard AQSh dollaryn quraıdy. 2017 jylǵa deıingi bul ınvestıtsııalyq baǵdarlama jumys istemeı turǵan úsh energoblokty paıdalanýǵa berýdi, elektr stansysynyń jobalyq qýattylyǵyn 2500 MVt-tan 4000 MVt-qa jetkizip qalpyna keltirýdi, jáne de elektr súzgilerin birte-birte ornatýdy qamtyp otyr.
«Qazaqmys» toby (Qazaqmys PLS) tabıǵı resýrstardy óndirý jáne qaıta óńdeý jónindegi jetekshi halyqaralyq kompanııa bolyp tabylady jáne mys, altyn, myrysh, kúmis, elektr energııasy, sonymen qatar munaı óndirý salalarynda asa qomaqty qatysý úlesi bar.
