Qazaqmys toby 2011 jylǵy birinshi toqsannyń óndiristik nátıjelerin jarııalady
ASTANA. 4 mamyr. QazAqparat - Búgin Qazaqmys Toby 2011 jyldyń birinshi toqsanyndaǵy óndiristik nátıjelerin jarııalap otyr,
dep habarlady kompanııanyń baspasóz qyzmeti.
Mys pen qosarly ónimder óndirisindegi kórsetkishter 2011 jylǵa bekitilgen josparǵa saı keldi. Menshikti kontsentrattan alynǵan katodty teńgerimdegi mys kólemi 74 myń tonnany qurady. Qosarly ónimderdi óndirýde de josparly nátıjelerge qol jetkizilgen: kontsentrattaǵy myrysh óndirý - 36 myń tonnany qurady; kúmis - 2 332 myń ýntsııa; altyn - 19,3 myń ýntsııa. Osy jyldyń ekinshi toqsanynda ıgeriletin aıaqtalmaǵan jumystar kólemi altyn men kúmis óndirý nátıjelerinde baıqaldy.
Ekibastuzdyń GRES-1 stansasy da qyzmetinde aıryqsha nátıjelerge qol jetkizip keledi. Ótken jyldyń birinshi toqsanyndaǵymen salystyrǵanda, elektr energııasynyń óndirilimi 22 paıyzǵa artqan. Bul Qazaqstan men Reseıdiń energetıkalyq naryqtarynda suranystyń turaqty bolýymen, tarıftiń ósýimen jáne ótkizilgen jóndeý jumystarynyń nátıjesinde kásiporyndaǵy negizgi jáne qosalqy jabdyqtardyń jumysyndaǵy senimdilik koeffıtsıenti joǵarylaǵandyǵyna baılanysty.
Topty damytýdyń iri jobalardy iske asyrý men ıeliktegi aktıvterdi ońtaılandyrýǵa baǵyttalǵan strategııasy josparlanǵan jumys kestesine sáıkes júzege asyrylýda. Qazaqstan qalalarynyń ınfraqurylymdaryn damytýǵa jaǵymdy áserin tıgizip otyratyn Kompanııanyń belsendi áleýmettik qyzmeti jalǵasyn taýyp keledi. Qazaqmys qaıǵyly ýaqıǵalar men jaraqattanýshylyqtardyń aldyn alýǵa, qaterler men negizgi sebep-saldarlaryn joıýdy nazarda ustaı júrip, óndiristegi qaýipsizdikti jaqsarta túsýge qomaqty qarajat ınvestıtsııalap otyr. Sonymen qosa, birinshi basshylar qyzmetkerleri óz qaýipsizdikteri men ózgelerdiń de qaýipsizdikterin qamtamasyz etý jónindegi bastamalardy uǵyna alatyndaı óndiristik ortany qurý isin qolǵa alyp otyr.
Qazaqmys Tobynyń basqarýshy bas dırektory Oleg Novachýk, óz sózinde: «Toptyń barlyq kásiporyndary jyldyń basyndaǵy ońaıǵa tımegen aýa-raıyna qaramastan alǵashqy úsh aıdy jaqsy kórsetkishtermen aıaqtady, sóıtip biz osy jyl ishinde óndiristi josparly deńgeıde saqtaıtyndyǵymyzǵa senimdimiz. Álemdik metall naryqtaryndaǵy jaǵymdy dınamıka men bizdiń tapsyrys berýshilerimizdiń tarapynan suranystar turaqty bolýy 2011 jylǵa senimdi boljamdar jasaýǵa septigin tıgizip otyr»-dep túsindirdi.
