«Qazaqmys» korporatsııasynyń «Stepnoı» kenishindegi jarylys tehnıkalyq qaýipsizdik sharalaryn saqtamaýdan boldy - komıssııa qorytyndysy
QARAǴANDY. Maýsymnyń 30-y. QazAqparat /Valentına Elızarova/ - Qaraǵandy oblysyndaǵy Sátbaev qalasyndaǵy «Qazaqmys» korporatsııasy» JShS-i «Jezqazǵantústimet» óndiristik birlestiginiń «Stepnoı» kenishindegi jarylys tehnıkalyq qaýipsizdik sharalaryn saqtamaýdan boldy. Adam ólimi oryn alǵan oqıǵany tergegen TJ komıssııa músheleri osyndaı sheshimge keldi.
«QR TJM TJ memlekettik baqylaý jasaý jáne kásiporyndar qaýipsizdigi jónindegi komıtettiń taý-ken-metallýrgııalyq óndiriske baqylaý jasaý basqarmasynyń bastyǵy Maqsutbek Qaratorǵaev jetekshilik etken komıssııa óz jumysyn aıaqtady. Jarylys sebebi - dánekerleý jumystaryn júrgizý kezinde tehnıkalyq qaýipsizdik erejelerin saqtamaý», - dep habarlady Qaraǵandy oblystyq TJD bastyǵynyń orynbasary Vladımır Pfarger.
