«Qazaqmys» korporatsııasy Ońtústik Koreıadaǵy jetekshi gospıtaldyń resmı seriktesi atandy

NUR-SULTAN. QazAqparat - «Qazaqmys» korporatsııasy Ońtústik Koreıa Respýblıkasyndaǵy jetekshi gospıtaldardyń biriniń resmı seriktesi atandy, dep habarlaıdy QazAqparat.

Uzaqmerzimdi yntymaqtastyq týraly úshjaqty memorandýmǵa «Qazaqmys korporatsııasy» JShS, ońtústikkoreıalyq Ense ýnıversıtetiniń «Severans» gospıtali jáne «Severance-KZ halyqaralyq medıtsınalyq qory» qoǵamdyq qorynyń basshylary qol qoıdy.

«Severans» gospıtali Koreıa Respýblıkasyndaǵy mańdaıaldy medıtsınalyq mekemelerdiń biri jáne Azııanyń densaýlyq saqtaý júıesinde kóshbasshy dep tanylǵan. Onyń mamandary Ense Ýnıversıtetiniń akademııalyq bazasynda jumys isteıdi.

Qol qoıylǵan qujatqa sáıkes, ońtústikkoreıalyqtar Jezqazǵan Medıtsınalyq ortalyǵynyń mamandaryna ǵylymı jáne ónerkásiptik medıtsına salasynda tájirıbelik jáne konsýltatıvtik kómek kórsetedi. Sonymen birge, kelisimde densaýlyq saqtaý salasyna zamanaýı tehnologııalardy engizý jáne Ense Ýnıversıteti ázirlegen arnaıy baǵdarlama negizinde bizdiń medıtsına qyzmetkerlerimizdi oqytý kózdelgen.

«Mundaı tyǵyz yntymaqtastyq «Qazaqmys» kompanııalar tobynyń jumysshylary men Jezqazǵan óńiriniń turǵyndaryna sapaly medıtsınalyq qyzmet kórsetý isindegi alǵa qoıǵan maqsattarymyzdyń oryndalýyna oń yqpal etedi dep úmittenemiz»,- dedi «Qazaqmys korporatsııasy» JShS Basqarýshy keńesiniń bas dırektory Baqtııar Qyryqpyshev.

Qol qoıylǵan memorandým Qazaqstannyń Tuńǵysh Prezıdenti bastap bergen densaýlyq saqtaý salasyndaǵy Qazaqstan-Koreıa yntymaqtastyǵyna qosylǵan ólsheýsiz úles bolmaq. Sebebi, Nursultan Nazarbaev Ense Ýnıversıtetiniń qurmetti professory ekeni belgili.

«Qazaqmys Holdıngi» JShS - tabıǵı resýrstardy óndirý jáne qaıta óńdeý boıynsha jetekshi kompanııa, Qazaqstandaǵy iri mys óndirýshi kásiporyn. Kompanııa quramynda - on tórt kenish, tórt taý-ken baıytý fabrıkasy, eki mys balqytý zaýyty jáne eki kómir razrezi bar. Qazaqmys ken óndiretin jáne ony óńdep, taýarly metalǵa aınaldyratyn óndiristik nysandardy basqarady. 2018 jyly 238,858 myń tonna katodty mys óndirildi, 3112 kg altyn quımalary alyndy. Bul kórsetkish ótken jyldyń sáıkes kezeńimen salystyrǵanda (2250 kg 2017 jyly) 862 kelige artyq (+38,3%). Sondaı-aq Qazaqmys - álemdegi iri kúmis óndirýshilerdiń biri-2018 jyly 242,0 tonna tazartylǵan kúmis alyndy.

Korporatsııa kásiporyndar men óńirlerdi elektr energııasymen qamtamasyz etetin ishki elektr stantsııalaryna ıe.

Jumysshylardyń jalpy sany - shamamen 38 800 adam.