Qazaqmys korporatsııasy BAQ ókilderine qurmet kórsetti
ALMATY. 9 shilde. QazAqparat /Ádilet Musahaev/ - Keshe Almatyda «Qazaqmys Korporatsııasy» JShS otandyq jýrnalısterdi kásibı merekelerimen jáne Astan kúnimen quttyqtap,
korporatsııa tóńireginde tushymdy maqala jazǵan qalamgerlerdi túrli atalym boıynsha anyqtaı otyryp, 26 jeńimpazǵa syılyqtar tabys etti.
Basqosýǵa elimizdiń ár túkpirinen 60-tan astam jýrnalıst qatysty. Jeńimpazdar sońǵy jylda BAQ-da jasaǵan jarııalanymdaryna monıtorıng jasaý jolymen anyqtaldy.
Sonymen «shynaıy jarııalaýdyń qaǵıdattaryna adaldyǵy úshin» atalymda bas júldeni «Panorama» gazetiniń jýrnalısi Elena Býtyrına ıelendi. Sondaı-aq «Egemen Qazaqstan», «Kazahstanskaıa Pravda», «Vremııa», gazetteri, Óskemendik «Dıdar», «Rýdnyı Altaı», Balqashtaǵy «Pýls» gazetterimen qosa elimizdiń birqatar jetekshi basylymdar marapattaldy.
«Qazaqmystyń júldesin kútpegen jerden utyp aldym. Elimizdegi kompanııalardyń jýrnalısterdiń atqaryp jatqan eńbegin elep-eskerip jatqandyǵy óte qýantarlyq jaǵdaı. Eńbegimiz kóp jaǵdaıda eskerile bermeıtin shyǵar, áıtkenimen de mundaı júlde alǵan jaǵymdy áser qaldyrady», -deıdi E. Býtyrına.
«Jýrnalıstıka ómirimizde óte mańyzdy rol atqarady, keıde ol jekelegen adamdardyń, kompanııalar men tipti jalpy bir memlekekttiń taǵdyryna da áser etedi. Sizderdi «tórtinshi bılik» dep tegin aıtpasa kerek, ári sizderdiń qyzmetterińizge jas memleketimiz úlken mán berýde», -dep atap ótti Qazaqmys toby dırektorlar keńesiniń múshesi, «Qazaqmys Korporatsııasy» JShS Basqarma tóraǵasy Edýard Ogaı.
Sonymen qatar ol jýrnalıster tarapynan baspasóz ókilderimen jumys isteý qıynǵa soǵa ma dep qoıylǵan suraqqa: «eger mekemeniń jasyratyn málimetteri bolmaı, tek ashyq túrde jumys isteı bilse esh qıyndyq bolmas edi», -dep jaýap berdi.
