«Qazaqmys» Kóksaı jáne Aıdarly ken oryndaryn ıgerýge 2 trln teńgeden astam ınvestıtsııa salady

Jobalar shamamen 2,6 myń jańa jumys ornyn qurýdy kózdeıdi. «Qazaqmys korporatsııasy» JShS-niń Kóksaı (Jetisý oblysy) jáne Aıdarly (Abaı oblysy) ken oryndaryn ıgerýge salǵan ınvestıtsııalary 2,056 trln teńgege baǵalanady.

Kóksaı ken ornyn ıgerý enshiles «Shoǵyrlandyrylǵan qurylys taý-ken kompanııasy» JShS bolyp tabylady. Aldyn ala baǵalaýlar boıynsha Kóksaı ken ornynyń boljamdy paıdalaný resýrstary 823,7 mln tonna kendi quraıdy, onyń ishinde mys – 3,5 mln tonna, ortasha quramy 0,42%, 63,7 tonna altyn jáne 865 tonna kúmis. Mys quramynyń tómendigin eskere otyryp, ken ornyn ıgerý úshin qýattylyǵy jylyna 50 mln tonna ken óńdeıtin taý-ken baıytý kombınatyn salý josparlandy. Kásiporynda 1,3 myńǵa jýyq zamanaýı jumys orny qurylady. Jobaǵa salynǵan ınvestıtsııalar 976 mlrd teńgege baǵalanady. Óndiristi iske qosý 2026 jylǵa josparlanǵan.

Aıdarly ken ornyn ıgerý operatory «Qazaqmys» korporatsııasyna kiretin «AidarlyProject» AQ bolyp tabylady. Aldyn ala baǵalaýlar boıynsha, Aıdarly ken ornynyń qory shamamen 1,53 mlrd tonnany quraıdy, onyń ishinde mys – 5,87 mln tonna, ortasha quramy 0,38%, 14,1 tonna altyn jáne 2 168 tonna kúmis. Ken ornynda paıdaly qazbalardy alý úshin jylyna 50 mln tonna ken óndiretin Taý-ken keshenin salý josparlanǵan. Munda 1,3 myńǵa jýyq jańa jumys orny qurylady. Jobaǵa ınvestıtsııalar 1,08 trln teńgege baǵalanady. Óndiristi iske qosý 2027 jylǵa josparlanǵan.

«Investıtsııalyq jobalardyń aýqymyn, mys quramynyń tómendigimen sıpattalatyn shıkizat bazasynyń erekshelikterin, sondaı-aq bolashaq óndiristerdiń ekologııalyq jáne ónerkásiptik qaýipsizdigine qoıylatyn joǵary talaptardy eskere otyryp, «Qazaqmys» kásiporyndardy jobalaýǵa jetekshi qazaqstandyq ǵylymı jáne izdestirý uıymdaryn, sondaı-aq salanyń tabysty halyqaralyq tájirıbeli keńesshilerin tartty. Olardyń qatarynda Reseıdegi Tomınsk jáne Mıheev ken oryndarynda kende paıdaly qazbalary az ken oryndaryn ıgerýde oń tájirıbesi qalyptasqan «Rýsskaıa med kompanııasy» toby bar», - dedi «Qazaqmys korporatsııasy» JShS Basqarma Tóraǵasy Nurahmet Nurıev.

Kóksaı jáne Aıdarly ken oryndaryn ıgerý jónindegi ınvestıtsııalyq jobalardyń respýblıkalyq mańyzy zor. Olardy iske asyrý Jetisý jáne Abaı oblystarynyń áleýmettik-ekonomıkalyq damýyna, sondaı-aq osy óńirlerdegi halyqtyń ál-aýqatynyń ósýine yqpal etetin bolady. Aldyn ala baǵalaýlar boıynsha jobalardy iske asyrý kezeńinde barlyq deńgeıdegi bıýdjetterge kásiporyndardyń jıyntyq salyq aýdarymdary 3,3 trln teńgeden asady.