«Qazaqmys» eńbek ujymymen jumys kezdesýiniń nátıjeleri týraly aıtty
Kenshiler men baıytýshylar kúni – bizdiń saladaǵy negizgi merekelerdiń biri. Kenshilerdiń korporatsııanyń, tutastaı memleketimizdiń damýyna qosyp jatqan úlesi kóp. Barlyǵyńyzǵa densaýlyq, sáttilik tileımin, - dep atap ótti Andreı Gaıdın.
Kezdesý barysynda top-menedjer kúndelikti jumysty uıymdastyrýdyń, eńbek ujymdarymen «keri baılanys» ornatýdyń, túrli deńgeıdegi basshylyq býyndarynda óz ýaqytynda sheshim qabyldaýdyń mańyzdylyǵyna toqtaldy.
Kásiporyn jumyskerleri taý-ken, shahta quraldarynyń daıyndyǵy men tehnıkalyq jaǵdaıyna qatysty máselelerdi kóterdi. Ol máseleler boıynsha Basqarma tóraǵasynyń birinshi orynbasary salalyq qyzmetterge jeke jınalys uıymdastyrýdy tapsyrdy.
Andreı Gaıdınniń aıtýynsha, jaqynda kásiporyndy basqarý júıesi ońtaılandyrylady.
«Jezqazǵantústimet», «Qaraǵandytústimet», «Balqashtústimet» óndiristik birlestikteri taratylyp, korporatsııa quramynda ken-baıytý kesheni qurylatyn bolady. Keshen bas dırektory kenish, fabrıka dırektorlarymen tikeleı jumys isteıtin bolady, - dedi Andreı Gaıdın.
Basqarma tóraǵasynyń birinshi orynbasary sondaı-aq, jumyskerlerdiń áleýmettik jaǵdaıy men eńbekaqy mólsheri kompanııa basshylyǵynyń nazarynda ekenin atap ótti.
Kompanııanyń kásiporyndarynda biryńǵaı áleýmettik saıasat júrgizemiz. Bul máselemen jumysshy toby aınalysyp jatyr. Kenshiler men baıytýshylarǵa kásibı merekege oraı 30 myń teńge kóleminde syıaqy tólenedi. Jyl basynda biz eńbekaqyny 30 paıyzǵa ósirdik. Biz ınflıatsııanyń, azyq-túlik baǵasynyń ósý deńgeıin turaqty baqylap otyrmyz. Ózderińiz biletindeı, bizdiń kompanııa áleýmettik baǵyttalǵan kompanııa retinde jumyskerlerdiń ál-aýqatyna turaqty kóńil bóledi. Sondyqtan, 2022 jyldyń 10 jeltoqsanyna deıin jalaqyny ósirý mólsheri jarııalanyp, 2023 jyldyń 1 qańtarynan bastap jalaqy kóteriletin bolady, - dep qorytyndylady sózin Basqarma tóraǵasynyń birinshi orynbasary.
Foto: kazakhmys.kz
