«Qazaqmystyń» sırek metaldardy «ken» retinde syrtqa shyǵaryp jatqany ras pa – depýtat saýaly

ASTANA. KAZINFORM – Májilis depýtaty Azat Perýashev Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı men Qurylys jáne ónerkásip mınıstri Ersaıyn Naǵasbaevqa «Qazaqmystyń» syrtqa shyǵaratyn mıneraldy shıkizaty týraly saýal joldady.

«Қазақмыстың» сирек металдарды «кен» ретінде сыртқа шығарып жатқаны рас па – депутат сауалы
Фото: Ағыбай Аяпбергенов/ Kazinform

— Qazaqstan tserıı, lantan, lıtıı sııaqty ónerkásiptiń joǵary tehnologııaly salalarynda strategııalyq mańyzǵa ıe sırek metaldardyń aıtarlyqtaı qoryna ıelik etip otyr. Ǵalam ekonomıkasynda sırek kezdesetin metaldar «jańa munaıǵa» aınalyp barady. Onyń qory álemdegi kúshterdiń teńgerimine tikeleı áser ete bastady. Bul resýrstardyń baqylaýǵa alý kúresi ýshyǵyp kele jatqanyn kórip otyrmyz. Sırek metaldardy tutynýdyń kólemi álem boıynsha jyl saıyn ósip otyr. Keıbir saraptamalyq boljamdarǵa qarasaq, suranys aldaǵy jaqyn jyldary 40 esege deıin ósýi múmkin. 2030 jylǵa qaraı bul naryqtyń kólemi jylyna 10 mlrd dollarǵa jetetini týraly boljamdar bar, — dep bastady ol.

Depýtat áleýmettik jeli men BAQ-ta «Qazaqmys» korporatsııasynyń osy saladaǵy zańsyz áreketteri týraly aqparat tarap jatqanyn atap ótti.

— Aqpan aıynda áleýmettik «Qazaqmys» korporatsııasynyń burynǵy zerthana mamanynyń aqparaty shyqty. Aıtýynsha, korporatsııa tonna-tonna mys kontsentraty men kendi hımııalyq taldaý júrgizbesten, quramyndaǵy baǵaly jáne sırek metaldardy jasyra otyryp syrtqa shyǵaryp jatyr. Mamannyń pikirinshe, osy arqyly kompanııa syrtqa shyǵarylyp jatqan resýrstardyń baǵasyn qoldan tómendetip, olıgarhtardyń paıdasy úshin el ekonomıkasyna shyǵyn keltirip jatyr. Taǵy bir suhbatta geologııa salasynyń sarapshysy taý-ken alpaýyty ondaǵan jyldar boıy ken men kontsentrattyń taldaýyn júrgizbesten, sheteldegi óndiriske sırek metaldyń shıkizatyn shyǵaryp kelgen. Atalǵan materıaldardyń siltemesin depýtattyq saýalmen birge joldaımyz, — dedi Azat Perýashev.

Osyǵan baılanysty depýtat sala basshylaryna birneshe usynys aıtty.

— Paıdaly qazba óndiretin kompanııalardyń syrtqa shyǵaryp júrgen keni men kontsentrattary hımııalyq taldaýsyz ketip jatqany týraly málimetti ne rastańyzdar, ne teris ekenin aıtyńyzdar. Eger aqparat jalǵan bolsa, kompanııa men tutas salanyń repýtatsııasyna zııan keltirgen jalǵan aqparat úshin sotqa berińizder. Al bul málimetter ras bolsa, sybaılas jemqorlyqqa qarsy tekserý júrgizip, kinálilerdi anyqtap, kelgen shyǵyndy qaıtarýǵa kúsh salyńyzdar. Mıneraldy shıkizattyń eksportyna kedendik baqylaýdy qatańdatyp, keden beketterin sırek metaldardy anyqtaıtyn arnaıy qondyrǵylarmen jabdyqtaýdy usynamyz, — dedi Azat Perýashaev.

Buǵan deıin Kazinform álemde sırek metaldarǵa nege suranys artqanyn jazǵan edi

Сейчас читают