«Qazaqmystaǵy» óndiristik jaraqattar sany 3 ese ósip ketken

Eldegi kásiporyndardyń 32%-y ǵana óz qyzmetkerlerin saqtandyryp otyr. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy Kazinform.

«Qazaqstanda 500 myńǵa jýyq adam zııandy eńbek jaǵdaılarynda jumys isteıdi. Ekonomıkalyq yntymaqtastyq jáne damý uıymy elderinde bul kórsetkish óndiristik protsesterdi avtomattandyrý jáne qaýipsizdik tehnıkasy deńgeıin arttyrý esebinen jyl saıyn azaıyp keledi. Al bizde óndiristik jaraqat alý kórsetkishi birshama joǵary ekenin atap ótýge týra keledi», - dedi ol.

Úkimet basshysynyń málimetinshe, elimizde jyl saıyn 2 myńǵa jýyq adam jumys barysynda jaraqat alady. Onyń ishinde 200-den astam adam mert bolady.

«Mysaly, bıyl «Qazaqmys» kompanııasynda óndiristik jaraqat alý kórsetkishi ótken jylmen salystyrǵanda 3 eseden astam ósip ketti.

Burynǵy «ArselorMıttal Temirtaýda» sońy adam ólimimen aıaqtalǵan qaıǵyly jaǵdaılardyń sany 7 eseden astam ósken.

Óndiriste qazir qoldanylyp júrgen jazataıym oqıǵalardan saqtandyrý júıesi jumys berýshilerdi eńbek jaǵdaılaryn jaqsartýǵa yntalandyrmaıdy. Búginde kásiporyndardyń tek 32%-i ǵana óz qyzmetkerlerin saqtandyryp otyr», - dedi Álıhan Smaıylov.