«Qazaqmysta» taǵy bir kenshi qaza tapty
ASTANA. KAZINFORM — «Qazaqmys» kompanııalar Toby óndiriste jazataıym oqıǵa bolyp, kenshi qaza tapqanyn habarlady.

— «Qazaqmys» kompanııalar Toby 2025 jyldyń 19 naýryzynda Ulytaý oblysynda ornalasqan Shyǵys-Jezqazǵan kenishinde jazataıym oqıǵa oryn alǵany týraly qaıǵyra habarlaıdy. № 57 shahtada taýarlyq-materıaldyq qundylyqtardy túsirý kezinde 1994 jylǵy jumysshy júk oqpany alańyndaǵy sańylaýǵa qulap ketken. Alǵan jaraqattarynyń saldarynan jumysshy oqıǵa ornynda kóz jumdy, — delingen habarlamada.
Oqıǵanyń mán-jaıy men sebebi anyqtalyp jatyr, jazataıym oqıǵany tergeý boıynsha arnaıy komıssııa quryldy.
«Qazaqmys» kompanııasynyń basshylyǵy men ujymy marqumnyń jaqyn týǵan-týysqandaryna qaıǵylaryna ortaqtasyp, kóńil aıtady. Qaza tapqan jumyskerdiń otbasyna ujymdyq shartta qarastyrylǵan barlyq qajetti kómek kórsetiledi, onyń ishine jerleý shyǵyndary da kiredi.
Eske sala keteıik, buǵan deıin «Bolashaq» shahtasyndaǵy tótenshe jaǵdaı kezinde zardap shekken jumysshy kóz jumǵan bolatyn.