«Qazaqmys» Jomart kenishindegi apat týraly: Taý jynysy opyrylmaǵan
JEZQAZǴAN. KAZINFORM – «Qazaqmys» korporatsııasy habarlaǵandaı, jeti kenshi qaza bolǵan Jomart kenishindegi apat ornynda avarııalyq-qutqarý brıgadalary taý jynysynyń opyrylmaǵanyn anyqtaǵan.
«Qazaqmys» kompanııasy Jomart kenishinde bolǵan apattyń bastapqy nusqasyn joqqa shyǵardy.
«Kenishtegi jumys tergeý aıaqtalǵanǵa deıin toqtatyldy. Tabıǵı gazdyń jarylýyna ne sebep bolǵany taldanyp jatyr. Kompanııa Úkimettik komıssııamen jáne tergeý organdarymen qoıan-qoltyq jumys isteýde jáne qoldanystaǵy qaýipsizdik standarttaryna túzetý engizýdi josparlap otyr. Sońǵy úsh jylda «Qazaqmys» eńbek qaýipsizdigine 87 mlrd teńgeden astam ınvestıtsııa saldy, al 2025 jylǵa josparlanǵan qarjylandyrý kólemi 38 mlrd teńgeni quraıdy. Kompanııa jumyskerlerdiń qaýipsizdigin qamtamasyz etýge basymdyq beredi», - dep málimdedi kompanııada.
Condaı-aq, habarlamada «Jomart» kenishindegi qaıǵyly oqıǵaǵa baılanysty «Qazaqmys» kompanııasy qaza tapqan jumyskerlerdiń otbasyn qoldaý úshin shuǵyl áreket etip, naqty shara qabyldap jatqany aıtylǵan. Atap aıtqanda, ishki shtab qurylyp, ótemaqy tóleý, máıitterdi tasymaldaý, nesıe boıynsha mindettemelerdi oryndaý jáne otbasy múshelerin jumyspen qamtý máseleleri nazarǵa alynǵan. Qaza bolǵan kenshilerdiń jaqyn týystarynyń ótinishi boıynsha úsh máıit Túrkistan, Qaraǵandy oblystaryna, qalǵandary Jezqazǵan, Sátbaev qalalaryna jetkizildi.
Budan bólek, «Qazaqmys» kompanııasynyń jumyskerlerin jazataıym oqıǵadan saqtandyratyn «KM Life» saqtandyrý kompanııasy qaza tapqan ár kenshiniń asyraýynda bala bolǵanyn eskerip, olardyń otbasyna asyraýshysynan aıyrylýyna baılanysty saqtandyrý tólemin taǵaıyndaıdy.
Saqtandyrý tóleminiń mólsheri qaza bolǵan kisiniń asyraýyndaǵy adamdardyń sanyna jáne onyń ortasha aılyq jalaqysyna baılanysty bolady. Bul tólemder balalar 18 jasqa tolǵanǵa deıin aı saıyn tólenedi, eger olar joǵary oqý ornynyń kúndizgi bóliminde oqysa, 23 jasqa deıin tólenedi. Sondaı-aq 14 jasqa deıingi balalarǵa kútim jasaıtyn, jumys istemeıtin analarǵa da tólem taǵaıyndalady.
Al ujymdyq kelisimshartqa saı, marqumdardyń otbasyna jerleý rásimin atqarý úshin 2,2 mln teńge mólsherinde birjolǵy tólem aýdarylǵan. Aldaǵy ýaqytta olarǵa 84 mln teńgeden 141 mln teńgege deıin jetetin jyldyq jalaqynyń 10 eselengen mólsheri tólenedi.
Sondaı-aq asyraýshysynan aıyrylý jaǵdaıyna aı saıynǵy tólemder, balalardyń oqý aqysyn tóleý, sondaı-aq otbasy músheleriniń ótinishi boıynsha basqa da kómek túrleri qarastyrylǵan.
Sonymen qatar qaza bolǵan kenshilerdiń bank aldyndaǵy qaryzy nazarǵa alynýda. Qazirgi tańda Bank RBK, Kaspi jáne Halyk Bank-te jalpy somasy 47,5 mln teńgeni quraıtyn nesıe men ıpoteka anyqtaldy. Qaryzdy óteý boıynsha jumys júrgizilýde.
Eske sala ketsek, 17 aqpanda Ulytaý oblysyndaǵy shahtada apat bolyp, 7 adam úıindi astynda qalǵan edi.
Keıin kabelderdiń úzilýine baılanysty jumysshylarmen baılanystyń joqtyǵy aıtyldy.
Shahta astynda qalǵan qalǵan jumysshylardyń barlyǵy mert bolǵany anyqtaldy.
Memleket basshysy Ulytaý oblysynda kenshilerdiń mert bolýyna baılanysty kóńil aıtty.
Aıta keteıik, qaza bolǵan kenshilerdiń otbasylaryna járdemaqylar men tólemder taǵaıyndalady.
Sondaı-aq Ulytaý oblysynda shahtanyń opyrylýyna baılanysty úkimettik komıssııa quryldy.
Ol jumysyn 10 kúnde aıaqtaıdy.