Qazaqmys jańa aktsıonerdiń qolyna kóshedi

ASTANA. KAZINFORM — «Qazaqmys» korporatsııasy jańa aktsıonerge «Qazaqmys korporatsııasy» JShS-ǵa baqylaý júrgizý quqyǵyn ótkizýdi kózdeıtin kelisimniń negizdemelik shartyna qol qoıylǵanyn habarlady.

Kompanııanyń baspasóz qyzmeti atap ótkendeı, kelisimge «Qazaqmys» prezıdenti Vladımır Kım men Dırektorlar keńesiniń tóraǵasy Edýard Ogaıdyń ortaq sheshimi boıynsha qol qoıyldy. Qujatqa qol qoıý baqylaýdy tapsyrý protsesiniń bastalǵanyn bildiredi. Taıaýda belgilengen rásim aıasynda kelisim boıynsha barlyq tıisti is-sharalar men mindettemeler júzege asyrylyp, kompanııanyń úlesin satyp alý-satý kelisimsharty jasalady.

Sonymen qatar Qazaqstan Respýblıkasynyń zańnamalyq talaptarynyń saqtalýyna erekshe kóńil bólinedi. Salalyq normaǵa sáıkes, taý-ken-metallýrgııa sektorynda kompanııa úlesiniń ne aktsııasynyń ıesin aýystyrý úshin Qazaqstan Respýblıkasy Ónerkásip jáne qurylys mınıstrliginiń, sonymen qatar Básekelestikti qorǵaý jáne damytý agenttiginiń arnaıy ruqsatyn alý talap etiledi.

Sondaı-aq seriktesterin, kredıtorlardy, mınorıtarlyq qatysýshylardy jáne basqa da múddeli taraptardy habardar etý protsesi júrgiziledi. Bul sharalar protsestiń ashyqtyǵyn, der kezinde aqparattandyrýdy jáne barlyq normatıvtik talaptardy, onyń ishinde kompanııanyń qyzmetine qatysatyn tulǵalar aldyndaǵy mindettemelerdi saqtaýdy qamtamasyz etýge baǵyttalǵan.

— Qol qoıylǵan qujatqa sáıkes, aktsıonerdiń aýysýy óndiristik jáne operatsııalyq protsesterge, kelisimsharttyq mindettemelerge, qyzmetkerlerdiń áleýmettik kepildikterine jáne jumys oryndarynyń turaqtylyǵyna áser etpeıdi. «Qazaqmystyń» qyzmeti shtattyq rejımde, al aǵymdaǵy jáne perspektıvalyq jobalardy iske asyrý — qoldanystaǵy strategııalyq josparǵa saı jalǵasady, — delingen habarlamada.

Budan buryn amerıkalyq sarapshylar «Qazaqmys» kompanııasyndaǵy ónerkásiptik qaýipsizdik júıesin baǵalaýǵa kiriskenin jazǵan edik.