Qazaqmys Ulytaý oblysynyń damýyna 20 mlrd teńgeden astam qarajat bóledi
JEZQAZǴAN. KAZINFORM — Ulytaý oblysynyń ákimdigi men «Qazaqmys korporatsııasy» JShS ózara túsinistik jáne yntymaqtastyq týraly memorandýmǵa qol qoıdy. Mańyzdy qujat aıasynda 20 mlrd teńgeden astam somaǵa áleýmettik bastamalardy júzege asyrý josparlanǵan.
Qujatqa Ulytaý oblysynyń ákimi Dastan Ryspekov pen «Qazaqmys Korporatsııasy» JShS Basqarma tóraǵasy Rýslan Óskenáli qol qoıdy. Seriktestiktiń jańa kezeńi densaýlyq saqtaý, bilim berý, mádenıet jáne sport salalaryndaǵy jobalardy, óńir ınfraqurylymyn jańǵyrtýdy, abattandyrý jumystaryn jáne turǵyndar úshin qolaıly orta qalyptastyrýdy qamtıdy.
Memorandým aıasynda Ulytaý ýnıversıtetin ashý kózdelgen. Sondaı-aq bıyl óńirdegi eń iri jańa ortalyq meshitti (Jezqazǵan qalasy), Sátbaev qalasyndaǵy jańa travmatologııalyq pýnktti aıaqtap, paıdalanýǵa berý josparlanǵan. Budan bólek, óńirde teńdesi joq «Namys» balalar-jasóspirimder sport akademııasy» sport kesheni 150 oryndyq sport ınternatymen birge iske qosylady.
Oǵan qosa, Jezqazǵanda «Jastar» saıabaǵyn, «Ǵaryshkerler» baqjolyn jáne Keńgir sý qoımasynyń jaǵalaýyn abattandyrý jumystary júrgiziledi. S.Qojamqulov atyndaǵy teatr ǵımaratyn da kúrdeli jóndeý josparlanǵan.
Bastamalar qatarynda «Ulytau» fýtbol klýbyn qarjylandyrýdy jalǵastyrý da qarastyrylǵan.
Sonymen qatar jergilikti atqarýshy organdarǵa ınfraqurylymdyq jobalardy júzege asyrýda qoldaý kórsetý maqsatynda oblystyń sýmen jabdyqtaý, sý burý jáne energııamen qamtý júıelerin jańǵyrtýǵa arnalǵan birqatar jobalyq-smetalyq qujattama ázirlenedi.