«Qazaqmys» tehnıkalyq selenniń alǵashqy partııasyn jóneltti
ASTANA. KAZINFORM – Bul – Qazaqstanda vakýýmdyq dıstıllıatsııanyń biregeı ádisin qoldaný arqyly óndirilgen alǵashqy ónerkásiptik ónim, dep habarlaıdy Kazinform agenttigi.
Jaqynda osy joba týraly Premer-mınıstr Oljas Bektenov salalardy damytý boıynsha atqarylǵan jumys tıimdiligi týraly baıandamasynda aıtyp berdi.
– Balqash qalasyndaǵy «Qazaqmys Progress» JShS selendi tazartý jáne qaldyqty óńdeý tsehynda ST-1 markaly tehnıkalyq selen óndirildi. Jańa tehnologııa selenniń qosymsha qunyn álemdik naryq baǵasynyń 30%-ynan 97%-yna deıin arttyrdy. Alǵashqy jóneltilim kólemi – 100 tonna. Partııadaǵy selenniń mólsheri keminde 99,5%, – dep habarlady kompanııa ókilderi.
Bul tehnologııany Satbayev University Metallýrgııa jáne baıytý ınstıtýtynyń ǵalymdary ázirlegen. Osynyń arqasynda álemdik tústi metaldar naryǵynyń talaptaryna saı ónim óndirýge múmkindik beretin biregeı qondyrǵyny qoldaný ıgerildi.
– Vakýýmdyq dıstıllıatsııa ádisi reagentterdi qoldanbaı-aq, selendi joǵary deńgeıde tazartady, bul protsesti ekologııalyq turǵydan qaýipsiz etedi. Jobanyń tarıhy 2017-2018 jyldary «Qazaqmys Smeltıng» JShS baǵaly metaldar tsehyndaǵy gaz tazartý júıesin jańǵyrtýdan bastaldy. Nátıjesinde tazartylmaǵan selen óndirisi jylyna 60 tonnadan 100 tonnaǵa deıin artty. Bul ony tazartýdy ekonomıkalyq turǵydan tıimdi etti, – dep atap ótti «Qazaqmys».
Baǵaly metaldardy óndirýde qosalqy ónim retinde alynatyn bastapqy selendi tazartý jobasyn júzege asyrý 2020 jyly Balqash ónerkásiptik alańynda bastaldy. 2022 jyly jańa óndiristik ýchaske iske qosylyp, 2023 jyly ony ónerkásiptik eksplýatatsııalaý bastaldy.
Aıta keteıik, selen kún batareıalaryn, kóshirme apparattaryn, shyny men keramıka óndirisinde, sondaı-aq medıtsına men hımııa ónerkásibinde keńinen qoldanylady. Balqashtaǵy jańa óndiristiń iske qosylýy Qazaqstan men «Qazaqmystyń» álemdik tústi metaldar naryǵyndaǵy ekonomıkalyq pozıtsııasyn nyǵaıtýǵa úlken múmkindik ashady.
Qazaqmys qyzmetkerlerimen áleýmettik qorǵaýdy kúsheıtý boıynsha shart jasasqanyn jazǵan bolatynbyz.