«Qazaqmys» sırek metaldar kontsentratyn zańsyz eksporttaı ma – depýtat saýalyna jaýap berildi
ASTANA. KAZINFORM — Ónerkásip jáne qurylys mınıstri Ersaıyn Naǵaspaev Májilis depýtatynyń «Qazaqmys» kásiporny eksporttap otyrǵan ken men kontsentrattar týraly saýalyna jaýap berdi.
Depýtat neden kúmándandy?
Naýryz aıynyń basynda Májilis depýtaty Azat Perýashev Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı men Qurylys jáne ónerkásip mınıstri Ersaıyn Naǵasbaevqa «Qazaqmystyń» syrtqa shyǵaratyn mıneraldy shıkizaty týraly saýal joldaǵan bolatyn.
— Aqpan aıynda áleýmettik jelide «Qazaqmys» korporatsııasynyń burynǵy zerthana mamanynyń aqparaty shyqty. Aıtýynsha, korporatsııa tonna-tonna mys kontsentraty men kendi hımııalyq taldaý júrgizbesten, quramyndaǵy baǵaly jáne sırek metaldardy jasyra otyryp syrtqa shyǵaryp jatyr. Mamannyń pikirinshe, osy arqyly kompanııa syrtqa shyǵarylyp jatqan resýrstardyń baǵasyn qoldan tómendetip, olıgarhtardyń paıdasy úshin el ekonomıkasyna shyǵyn keltirip jatyr. Taǵy bir suhbatta geologııa salasynyń sarapshysy taý-ken alpaýyty ondaǵan jyl boıy ken men kontsentrattyń taldaýyn júrgizbesten, sheteldegi óndiriske sırek metaldyń shıkizatyn shyǵaryp kelgen. Atalǵan materıaldardyń siltemesin depýtattyq saýalmen birge joldaımyz, — degen bolatyn Azat Perýashev.
Mınıstrliktiń qasań jaýaby
Ersaıyn Naǵaspaevtyń osy saýalǵa joldaǵan jaýaby «Qazaqmys» eshqandaı zańsyzdyqqa baryp otyrǵan joq degenge saıady. Ol ýájdiń dáleli retinde «Qazaqmys» korporatsııasynyń málimetinen dáıeksóz usynǵan.
— Zańnamalyq aktilerge sáıkes quramynda baǵaly metaldar bar shıkizatty eksporttaý kezinde mınıstrlik ruqsat qujattaryn beredi. Memlekettik qyzmetter kórsetý qaǵıdalaryna sáıkes ótinish berýshi taý-ken metallýrgııa ónerkásibi salasynda qujattardy, onyń ishinde akkredıttelgen synaq zerthanasy bergen baǵaly metaldardyń jáne ilespe alynatyn metaldardyń quramy týraly qujatty usynady. Onda quramynda baǵaly metaldar bar shıkizat taýarlaryndaǵy barlyq baǵaly metaldardyń úlestik quramy týraly málimetter kórsetilýge tıis. Atap aıtqanda, «Qazaqmys korporatsııasy» JShS «SJS Kazahstan Ltd» JShS zerthanalarynyń bazasynda taldaý júrgizedi. Onda álemdik standarttarǵa sáıkes keletin zamanaýı Taldamalyq zerthana salý jobasy iske asyryldy, — dep jazylǵan jaýapta.
Jyl saıyn 14,3 mln tonna ken eksporttaımyz
Atalǵan mınıstrliktiń Kazinform saýalyna joldaǵan málimetine sensek, Qazaqstan negizinen kontsentrattar eksporttap otyr.
2024 jyly eksporttalǵan kontsentrattar:
- kómirtektenbegen temir kontsentrattary — 5,7 mln tonna (2023 jylǵydan 9,4% az)
- aglomeratsııalanǵan temir kontsentrattary — 4,8 mln tonna (2023 jylǵydan 2,4% az)
- mys kontsentrattary — 1,8 mln tonna (2023 jylǵydan 5,6% az)
- marganets kontsentrattary — 214,4 myń tonna (2023 jylǵydan 36,3% kóp)
- qorǵasyn kontsentrattary — 45,7 myń tonna (2023 jylǵydan 18% az)
- myrysh kontsentrattary — 431,1 myń tonna (2023 jylǵydan 15,9% az)
- hrom kontsentrattary — 294,2 myń tonna (2023 jylǵydan 24,7% az)
- sazbalshyq (glınozem) — 997,9 myń tonna (2023 jylǵydan 14,3% kóp).