«Qazaqmys» nysandarynan janarmaı men ken urlaǵan toptar ustaldy
ASTANA. KAZINFORM – ІІM strategııalyq mańyzy bar kásiporyndardaǵy ekonomıkalyq qaýipsizdikti qamtamasyz etý aıasynda «Qazaqmys korporatsııasy» nysandaryndaǵy birneshe urlyq shemasynyń jolyn keskenin málimdedi, dep habarlaıdy Polisia.kz.
Vedomstvo málimetinshe, Ulytaý oblysynda ótken jyldan beri kásiporyn aýmaǵynan urlyq jasaǵan birneshe qylmystyq toptyń áreketi toqtatylǵan.
Qabyldanǵan sharalardyń nátıjesinde keltirilgen shyǵynnyń 94,5 paıyzy ótelgen.
Tergeý barysynda jergilikti qylmystyq toptardyń jetekshiligimen áreket etken adamdardyń quramynda baǵaly metaldar kóp ken qorytpalaryn urlaý shemasyn uıymdastyrǵany anyqtalǵan.
Bıyldyń ózinde polıtseıler iri kólemde shyǵyn keltirilgen tórt urlyq deregin ashqan.
Sonymen qatar 7 mamyr kúni kompanııa aýmaǵynan janarmaı urlaýǵa qatysty zańsyz áreketterdiń joly kesilgen.
Jedel is-sharalar barysynda urlyqty uıymdastyrdy jáne janar-jaǵarmaı materıaldaryn satýmen aınalysty degen kúdikke ilingen adamdar ustaldy.
Polıtsııa málimetinshe, bir tonnadan astam janarmaı, iri kólemdegi aqsha, kólik quraldary, oq-dárisi bar qarý jáne ózge de zattaı dáleldemeler tárkilengen.
Tergeý barysynda urlyqtyń arnaıy tehnıkaǵa jalǵan janarmaı quıý jáne qujattardy qoldan jasaý arqyly júzege asyrylǵany belgili boldy.
Sondaı-aq kúzet qurylymdarynyń keıbir qyzmetkerleriniń kómekteskeni anyqtalǵan.
– Qazirgi ýaqytta tergeý-jedel is-sharalarynyń kesheni júrgizilip jatyr. Qarjylyq-sharýashylyq qujattarǵa taldaý jasalýda, keltirilgen shyǵyn kólemi anyqtalyp jatyr. Aldyn ala málimet boıynsha shyǵyn asa iri kólemde bolýy múmkin, – dedi ІІM Uıymdasqan qylmysqa qarsy kúres departamentiniń ókili Qýandyq Alpys.
Aıta keteıik, asa iri mólsherde urlyq jasaǵany úshin kúdikti Grýzııadan ekstradıtsııalandy.
