Qazaqmys kúkirt tsehynan taraǵan zııandy qaldyq úshin ulytaýlyqtarǵa ótemaqy tóleı me – ákim jaýaby

«Qazaqmys» ózine qarasty mys zaýytynyń kúkirt tsehyn 30 jyl boıy jańartpaǵany úshin turǵyndarǵa ótemaqy tóleı me? Ortalyq kommýnıkatsııalar qyzmetinde ótken brıfıngide Ulytaý oblysynyń ákimi Berik Ábdiǵalıulyna osyndaı suraq qoıyldy, dep habarlaıdy Kazinform.

«Olar bizdiń ekologııaǵa jyl saıyn 6 mlrd teńgedeı qarajat bólip otyr. Ony biz qoqys shyǵarýǵa, káriz júıesin jańalaýǵa, ekologııany durystaý jumystaryna jumsaımyz. Al kúkirt qyshqyl tsehynyń máselesi Ekologııa mınıstrliginiń quzyretinde. Sonyń ishinde departament kúkirt tsehyn jańartý jobasyn tezdetýdi baqylaýda ustap otyr. Olardyń bergen málimdemesi boıynsha, 2025 jyly qurylysty aıaqtaımyz deıdi. Sonda qorshaǵan ortaǵa tastalatyn shyǵaryndy da azaıady», - dedi aımaq basshysy. 

Ákimniń sózinshe, alpaýyt kompanııa turǵyndarǵa ótemaqy tólemegenmen, bıýdjetke aıyppul tólep otyr.

«Ótemaqy degende, olar emıssııa tólep jatyr. Aıyppul berilip jatyr. Ekologııa mınıstrligine qarasty departament eskertý berip otyrady. Tútinnen basqa ózderiniń óndiristik úıindisi bar. Sol boıynsha da mindettemeleri bar. Mıllıardtaǵan qarjy bólip, sol úıindilerdiń qorshaǵan ortaǵa taramaýyn qadaǵalap otyr. Buryn ekologııa mınıstrliginiń departamenti Qaraǵandyda boldy. Qazir Jezqazǵanda otyr. Sonymen qatar prokýratýra jaǵynan qadaǵalaý bar. Al jańa kúkirt tsehyn 2025 jyly qoldanysqa beremiz», - dedi Berik Ábdiǵalıuly.