«Qazaqmys» komandasy shaǵyn fýtboldan Euro Business Cup chempıonatynyń «qola» júldegeri atandy
ASTANA. KAZINFORM - Túrkııanyń Antalıa qalasynda ótken shaǵyn fýtboldan Euro Business Cup halyqaralyq chempıonatynda «Qazaqmys» komandasy «qola» júldeger atandy.
Álemniń ártúrli elinen 28 komanda qatysqan baıraqty básekede «Qazaqmys» komandasy toptyq kezeńde ózbekstandyq CCS Progress-pen (1:1), túrkııalyq CMS-pen (2:1) jáne rýmynııalyq Damen Galati komandasymen (3:2) kezdesip, eki jeńis pen bir teń oıyn arqyly birinshi oryn alyp, pleı-offqa shyqqan bolatyn.
Al 1/8 fınalda «Qazaqmys» Slovakııanyń «Schaeffler» komandasynan 4:3 esebimen basym tústi. Shırek fınalda komanda Moldovanyń «MAIB» komandasymen jasyl alańda kezdesti. Negizgi ýaqytta qarsylastar bir-birinen basym túse almaı, oıyn 1:1 esebimen teń aıaqtaldy. Osydan keıin jeńimpaz taǵdyryn penaltı serııasy sheshti. Penaltı kezinde qazaqmystyqtar mergendik tanytyp, moldavalyqtardy 2:0 esebimen jeńdi.
Jartylaı fınalda «Qazaqmys» komandasy týrnırdiń byltyrǵy chempıony – Ázerbaıjannyń «Azersun» komandasymen kezdesip, ókinishke qaraı 1:2 esebimen ese jiberdi. Oıyn barysynda otandastarymyzdyń qatarynda Marlen Eralıev qana mergendik tanyta aldy.
Eske sala keteıik, qyrkúıek aıynda komanda AGMP Kýbogyna arnalǵan shaǵyn fýtboldan salalyq týrnırdi jeńip, Qazaqstannyń taý-ken metallýrgııa salasyn tanystyrý úshin Túrkııaǵa attanǵan bolatyn.