Qazaqmys qyzmetkerlerimen áleýmettik qorǵaýdy kúsheıtý boıynsha shart jasasty
ASTANA. KAZINFORM – Qazaqmys kompanııasy qyzmetkerleri men olardyń otbasyna kórsetiletin qoldaý sharalarynyń aıasyn keńeıtpek.
Keshe «Qazaqmys korporatsııasy» JShS 2025-2029 jyldarǵa arnalǵan jańa ujymdyq shartqa qol qoıdy. Jańa qujatta kompanııa basshylyǵy, kásipodaq usynystary men qatar qyzmetkerlerdiń de talaby eskerilgen. 2029 jylǵa deıin arnalǵan ujymdyq shart qyzmetkerlerdiń áleýmettik qorǵalýyn kúsheıtýge jáne korporatıvtik áleýmettik saıasatty damytýǵa baǵyttalǵan.
Osylaısha, kompanııa qyzmetkerleri men olardyń otbasyna kórsetiletin qoldaý sharalarynyń aıasyn aıtarlyqtaı keńeıtpek, ıaǵnı jumysshylardyń ál-aýqatyna ınvestıtsııa salýǵa daıyn.
Naqty aıtsaq, jańa ujymdyq shartqa sáıkes, bala dúnıege kelgende beriletin tólem kólemi burynǵy shartpen salystyrǵanda bes ese ósedi. Dál osyndaı tólem nekesin qıǵan, jas otbasylarǵa da qarastyrylady. Sondaı-aq múgedektigi bar jumysshylar men erekshe qajettiligi bar bala tárbıelep otyrǵan otbasylardy qoldaý sharalary engizildi.
«Qazaqmys korporatsııasy» JShS basqarma tóraǵasy Nurahmet Nýrıevtiń aıtýynsha, jańa ujymdyq shart qyzmetkerler men olardyń otbasynyń turmystyq jaǵdaıyn arttyryp, áleýmettik turǵydan qorǵalýyn qamtamasyz etedi.
– Bizdiń ujym úlken. Sondyqtan ár qyzmetkerdiń qaýipsiz ortada jumys isteýine múddelimiz, ıaǵnı qaýipsizdik erejeleri – basty nazarda. Ekinshiden, árıne qyzmetkerlerdiń áleýmettik qorǵalýy mańyzdy. Úshinshiden, ekonomıkany qamtamasyz etýde kásiporynnyń ónimdiligi basty ról atqarady. Al, ónimdi jumys ujymǵa baılanysty. Osy oraıda qyzmetkerlerimizdiń qaýipsizdigin qamtý men qorǵaý – bizdiń basty mindetimiz, - deıdi Nurahmet Nýrıev.
Jumysshylardyń eńbek quqyǵyn qorǵaýda kásipodaqtyń da úlesi bar. Kásipodaq basshylyǵynyń málimdeýinshe, ujymdyq shartta jumys berýshiniń áleýmettik jaýapkershiligine basymdyq berilip, jumys berýshi, kásipodaq usynystary men qyzmetkerlerdiń talaby eskerilgen.
Qazaqmys ujymdyq sharttan bólek, basqa da áleýmettik baǵdarlamalardy iske asyrýdy josparlap, oǵan aýqymdy qarjy qarastyryp otyr. Mysaly, bıyldan bastap qoldanystaǵy erikti medıtsınalyq saqtandyrýǵa qalypty eńbek jaǵdaıynda jumys isteıtin qyzmetkerler de qatysa alady. Sondaı-aq bıyl 200-den astam páterdi jumysshylardyń menshigine berý josparlanǵan. Odan bólek, qyzmetkerler men regressshilerdiń jekelegen sanatyna ataýly áleýmettik kómek qarastyrylǵan. Buǵan qosa erekshe qajettiligi bar balalardy ońaltýǵa qarjy bólmek.
Eske sala ketsek, byltyr jyl sońynda Qazaqmys kompanııasy Balqashtyń ekojúıesin saqtaýǵa 5 mln dollar bóletini belgili boldy.